Naga helin AR sipai Mizo an kâp hlum

May 3, 2015 chawhnu lam khan Nagaland-a hel pawl, National Socialist Council of Nagalim - Khaplang (NSCN-K) pawlte'n Nagaland Mon dis­trict-a Changlangsu khaw bula Assam Rifles an lambunnaa AR mi pariat thite zingah Jerusalemthara (29) s/o Lalringliana, Vanbawng a tel.

Thu dawn danin, NSCN-K te hian AR hoin an motor hmanga tui an chawi tur chu an lambun a; chilpuah bomb an kam chu AR motor-in a chil puah hnuah, bomb dang leh silai hmangin an bei zui a ni. AR motor-ah hian mi 20 an chuang nia sawi a ni a; inbeihnaah hian AR mi pariat an thi a, paruk dang an hliam bakah, mi dang pali an awmna chin hriat a ni lo.

Vanbawng YMA hruaitu Zairem­thanga hnen aṭanga thu dawn danin, Jerusalemthara ruang hi nimin khan postmortem a ni a, vawiinah Aizawl rawn panpuiin, zaninah an khua thlenpui beisei a ni a, naktukah vui a ni ang.

Jerusalemthara hi kum 2005-ah Assam Rifles-ah a lut a; a nupui Lal­than­nguri nen fapa pathum an nei a, a nupui fanaute hi Vairengte-ah an awm mek nia thu dawn a ni.