Kuminah MIMER ṭan hman tum

Mizoram sorkar chu academic session 2015-16 chhunga Mizoram Institute of Medical Education & Research (MIMER)-a class ṭan hman ngei tumin a inbuatsaih zel a, sorkar laipui nen an indawr mek.

Hospital & Medical Education depart­ment aṭanga thu dawn danin, MIMER-ah academic season thara class ṭan a nih theihna atan Mizoram Health Secretary chuan tunlai hian Delhi-ah sorkar laipui hotute a dawr mek a; an inbiak dan azirin tun season thar lo awm turah MIMER hi ṭan a nih theih dawn leh dawn loh hriat theih beisei a ni.

HME department hotute chuan, MIMER dinna tur State Refferal Hospital, Falkawnah pawh class ṭan a nih theihna atan buatsaih zel a nih thu an sawi.

MIMER hi seat 50-a ṭan tum a ni a, mahse, Ministry of Health & Fami­ly Welfare-in seat 100 tala ṭan an phût avangin seat 100-a ṭan tum a ni. Rua­hman dan chuan kuminah chuan subject pathum - Anatomy, Biochemistry leh Physiology zirna hawn tum a ni.