Property Tax la turin AMC a la inpeih lo

Aizawl Municipal Council (AMC) chairman CT Zakhuma chuan, Pro­perty Tax dan hnuai­­a chhiah khawn turin an la inpeih loh thu Vanglaini palai zawhna chhangin a sawi.

CT Zakhuma chuan, Property Tax chu April 1, 2015 aṭanga hman ṭan a ni tih sawiin, "Pawisa khawn hun tur erawh hriat a la ni lo. Pawisa khawn tur hian buaipui tur tam tak a awm a, tih tur kan la ngah hle. Miin pawisa thla thum dan, kum chanve dan leh a dangte pawhin an pe duh thei a, chutiang tur chuan engkim peihfel vek a ngai a ni. Kan inpeihfel veleh Property Tax hi kan khawn ang," a ti.

CT Zakhuma sawi danin, Property Tax hi thil thar a ni lo a, Land revenue & Settlement department-in leiman a khawn ṭhina Building Tax pek tel ṭhin ang kha a ni a, Revenue de­partment-in la thawh loin, AMC-in Property Tax tia thlakin a la tawh zawk dawn a ni. Hmun tam takah chuan Building Tax-a chawi ngai ṭhin aiin Property Tax-ah chawi tur a tlem zawk dawn niin an sawi.

Hetih lai hian, tlawm­ngai pawl hrang hrang intêlkhawmna NGO Coordination Committee chuan Property Tax lak hi an duh lo a ni.