YMA-te'n hnathawh an enfiah

YMA sub-headquarters, Serchhip hnuaia Vigi­lance & Monitoring Sub-Committee chuan Serchhipa auditorium sak mek chu nimin khan an tlawh a, auditorium kawm­thlang lam dâwlna atana retaining wall siam meka an lung hman chu a ṭha tawk lo nia hriain, thawktute chu lung chang ṭha ngei hmang turin an ngen.

Serchhip YMA-te hian nimin vek khan Asian Development Bank (ADB) sum hmang­a Serchhip leh Buarpui inkar kawng laih tura hna thawh mek, Serchhip leh Thenzawl inkara kawng laihna hmun an enfiah bawk a; hna thawh chu ṭha thawkhata an hriat thu an sawi. Kawng laih zuah hna hi Tantia Constructions-in an thawk a, hmun eng emaw zat chu laih zawh a ni tawh a, kumin tawp lamah a laih zauh hna chu zawhfel theih beisei a ni.

Kawng laih meka mimal ram neitu chhung­kaw pahnihte'n zángna­dawmna pek chung­changa lungawi lohna an neih vanga harsatna awm nia lang chungchangah Serchhip YMA chuan a ṭul anga hmalak an tum thu an sawi.