Vote chhiar nawn turin ngen

Mamit district chhung, Pukzing leh Damdiai khuaa Congress party-te chuan April 30, 2015-a neih zawh tak village council inthlana vote tlate chu ennawn tur­in election officer (EO) hnenah an ngen.

Thu dawn danin, Pukzinga Congress party-te chuan counting supervisor ruat belh chung­changah an party râwn an nih loh thu sawiin, vote tlate ennawn turin EO an ngen a ni. Pukzingah hian vote 91.1% a tla a, seat awm zawng zawng, seat pathum chu MNF-in an la vek a ni.

Damdiai khuaa Congress party-in vote tla ennawn tura an ngenna chhan chu vote thi a tam vang a ni. Damdiai-ah hian vote tla 296 zinga 37 chu a thi a, seat pathum awmah MNF-in seat hnih leh Congress-in seat khat an la a ni.