VANGLAINI ZIRCHIANNA INC-in hma an sawn; MNF an tlahniam hret
Mizoram district paruka village council inthlanah kum 2012 leh 2015-ah Mizorama political party lian ber pahnih - Congress party leh MNF-te chuan ngai an awh ve ve anga ngaih theih a ni a; local council inthlanah erawh chuan INC-in hma an sawn hret a, MNF an tlahniam hret thung.
VC inthlanna hi kum 2012-ah aiin 2015-ah a tam zawk a; kum 2012-ah VC 504-ah inthlan a nih laiin, kuminah chuan 493-ah inthlan a ni. Party lian pahnih - INC leh MNF-te chuan kuminah hian kum 2012-a VC an lak zat an pha lo ve ve a; INC-in 2012-ah VC 285 an lak laiin, 2015-ah chuan VC 269 an la a; MNF pawhin 2012-ah VC 132 an lak laiin, kuminah chuan VC 127 an la a ni.
Mizoram sorkara rorelna lo chelh tawh MPC party chu kum 2012 leh 2015-ah VC lak nei loin an 'nil' ve ve a; ZNP chuan hma nan sawn hret a, kum 2012-ah VC pahnih leh 2015-ah VC paruk an la. Kum 2012-ah BJP thâwm a awm loh laiin, kum 2015-ah chuan VC panga an la a; kum 2012-a VC pakhat latu HPC erawh chuan kuminah thawm an nei lo ve thung.
Independent candidate-te an chakna VC chu kum 2012-ah 20 a awm laiin, 2015-ah chuan 45 a awm a; party mal chak bik awm lohna kum 2012-ah VC 53 leh kum 2015-ah VC 50 a awm bawk.
Hetih lai hian, VC-ah hian kum 2009 inthlanah chuan VC 555-ah inthlanna neih a ni a, Aizawl khawpuia veng hrang hrangte pawh Aizawl Municipal Council a la din loh avangin VC an la ni vek a ni.
Kum 2009 VC inthlanah hian INC-in seat 444 (80.00%) lain, an chak filawr hle a; an elpui ber MNF-in VC 30 (5.41%)chiah an la thei a ni. ZNP leh HPC ten VC pakhat (0.18%) ve ve an la a; United Democratic Alliance (UDA)-in VC pathum (0.54%) an la. Independent candidate-te chakna VC 18 (3.24%) leh party chak bik awm lohna VC 58 (10.45%) a awm bawk.
Local council bikah chuan, Congress party-in hma an sawn a, kum 2012 inthlanah seat 225 laa LC 29-ah hnehna an chan laiin, 2015-ah chuan seat 254 lain, LC 39-ah hnehna an chang. MNF party erawh an tlahniam hret a; kum 2012-ah seat 263 laa LC 42-ah sorkarna an siam theih laiin, kum 2015-ah chuan seat 239 lain, LC 29-ah sorkarna an siam thei a ni.
MPC leh ZNP-te chuan kum 2012 leh 2015-ah hian hnehna channa local council an nei lo ve ve a, MPC erawh chuan kuminah MNF nen ṭang duna an chakna LC pakhat a awm. MPC hian kum 2012-ah seat 17 an lak laiin, 2015-ah seat 10 an la a; ZNP-in kum 2012-ah seat 14 leh 2015-ah seat 16 an la. Independent candidate-te;n LC an siamna hi kum 2012 leh 2015-ah LC pahnih ve ve a awm a; party chak bik awm lohna LC chu kum 2012-ah 11 lai a awm laiin, kuminah chuan pathum chiah a awm thung.