SRS-in mi 221 an khawm tawh

Central YMA hnuaia Supply Reduction Service (SRS) chuan April 11, 2015-a bul an ṭan thar leh aṭanga tun thlengin ruihhlo eng emaw zat an man tawh a, ruihhlo kaihhnawihah mi 221 an khâwm tawh bawk.

SRS secretary RL Zomawia tarlan danin, SRS-in ruihhlo an man tawhte chu - heroin hawng 19, can 116.5 leh chhinsen hnih; Alprozelum strip 19 leh ganja fûn 6 a ni a; heroin man tawhte hi mi 1,50,000-in ṭum khata an ruih theih anga ngaih a ni.

Ruihhlo kaihnawihah leh khawlaia awm ṭha duh lo mi 221 an khawm tawh a; chung zinga mi 13 chu magistrate hriatpuiin Protective Home leh home dangahte an dah a, kum tling lo mi pahnih chu Child Welfare Committee kutah dahin, Excise & Narcotics kutah mi pali leh Police kutah mi pariat an hlan bawk.

SRS chuan, mi an khawmte zinga a tam zawk chu an awmna veng YMA hruaitute leh an nu leh pa, an chhungkhatte an kohsak a, an dinhmun leh an harsatna an hrilhfiah hnuah Central YMA Hall-ah counselling class an neihpui ṭhin tih an sawi a, "An dinhmun aṭanga khai chhuak thei turin SRS-in theihtawpa hmalak chhunzawm zel a tum a ni," an ti.

SRS hotute chuan, Zodin Square leh Vanapa Hall kawt velte chu SRS din hnuah hmuh theih khawpin a felfai chho leh tawh niin an sawi a, "SRS-in hma a lak leh hnu hian ruihhlo a tawmim chho ṭan leh ta a, ruihhlo man (rate) pawh a sang chho leh ta hle a ni. Aizawl khawpui lûn lai ṭawp tak pawh SRS hmalakna vang­in hmuh theih khawpin a thianghlim sâwt hle," an ti a; ni tin heroin hawng khat man ziah ang an nih thu an sawi.

SRS secretary chuan, SRS hnathawhna atana ṭanpuina petu kohhran leh tlawmngai pawlte chung­ah leh ṭawngṭaisaktute zawng zawng chungah lawmthu a sawi a ni.