Mizoram Police din cham lawmna khar
Mizoram Police din champha tun hnaia kawng hrang hranga lawm a nih hnuah, nimin khan Police Headquarters-a Arya Mess tualah a khârna hun hman a ni a, Home minister Lalchamliana'n a hmanpui.
Inkhawm hi IGP (Hqrs.) John Neihlaia'n a kaihruai a; Home Minister chuan, uniform-ah tun aia ṭha, silai ṭhenkhat hlui tawhte chu sum awm dan ang zelin a ṭha zawka thlak tum a nih thu a sawi a, "Kan quarters-te pawh duhthu a sâm lo. Chumi atan chuan sorkar laipuiah proposal kan thehthla tawh a, tunah hian cheng vbc. 410 vel Home department tan project kan thehthla tawh. Amit Shah hi patling, ama thusawi tawha ding nghet a nih ngai chuan kan hmu ngei ang tih kan beisei tlat a ni," a ti.
Minister Lalchamliana hian Mizoram Police Raising Day pualin Beat Patrolling System a hawn bakah, Mizoram Annual Report 2019 a tlangzarh nghal a; kum khat chhunga police station ti ṭha zual pathum - Champhai, Lawngtlai leh Khawzawl-te hnenah lawmpuina a hlan bawk a ni. Mizoram police din champha lawm nan hian Home department buatsaihin Mizoram hmun hrang hrangah blood donation camp an huaihawt a, thisen unit 274 an pe tawh (nimina pek tel loin).
Raising Day pualin zai, lemziak, football leh shooting-ah inelna an buatsaih a; cultural programme leh ralthuam phochhuahna hun an buatsaih tawh a; 'Drug trafficking and abuse in Mizoram: Way forward' tih thupui hmangin seminar an buatsaih bawk.
Mizoram Police hi January 21, 1972-ah Assam sorkar hnuaia district pakhat (Mizo district) a nih laia din a ni. A tirah chuan Aizawl Police Headquarters hnuaiah unit pali - Aizawl DEF, Lunglei DEF, Chhimtuipui DEF, CID (SB) a awm a; armed battalion a awm nghal lo a, district SP hnuaiah district armed branch a awm thung. Police station paruk awmin, thawktu mi 200 vel an awm ṭhin a ni.
Tun dinhmunah Mizoram Police-ah range pathum - northern, southern leh eastern-te a awm a, district 11-ah superintendent of police (SP) dah vek a ni. Mizoram Police-a thawktu awm tur zat (sanction strength) chu mi 12,292 a ni a, tuna awm zat chiah (actual strength) erawh chu mi 9,006 (73.27%) niin, post ruak 3,286 (26.73%) a awm.
Mizoram Police-ah a din tirh aṭanga tun thlengin ram tana nunna chán mi 56 an awm tawh a, hna thawk ṭha leh police medal dawng tawh mi 341 an awm bakah, state, national leh international level-a sport competition hrang hrangah medal eng emaw zat an dawng tawh bawk.
Mizoram police medal dawn tawh dan
• President's Police Medal for Gallantry - 10
• Police Medal for Gallantry - 26
• President's Police Medal for Distinguished Service - 21
• Police Medal for Meritorious Service - 155
• Governor's Gold Medal - 115
• Governor's Silver Medal - 16