YMA-in râltlan kaihhruaina siam an duh; Mizoram kawngpuite YMA-in an vil dawn

YMA Rorel Inkhawm vawi 4-na chu nimin khan R Dengṭhuama Hall, Mualpuiah neih a ni a; an rorel zingah - Mizoram sorkarin raltlan kaihhruaina siam rawh se tih leh Mizoram kawngpuite vil kawngah YMA-in hma la rawh se, tih a tel.

YMA Rorel Inkhawm hi Central YMA president Lalhmachhuana'n a kaihruai a, YMA khawih agenda pariat leh sorkar khawih agenda panga an ngaihtuah. YMA khawih agenda pawm vek a ni a, pakhat chu tihdanglam hret a nih hnuah pawm a ni. Sorkar khawih agenda zingah chuan pakhat pawm a ni lo.

YMA khawih zingah, 'NHIDCL hnuaia Mizoram kawngpui siam hi vil zui kawngah YMA-in hma la rawh se' tih chu 'Mizoram chhunga kan kawngpui neihte vil kawngah YMA-in hma la rawh se' tia siamremin pawm a ni a; ruihhlo do kawngah chak zawka hmalak pawh an rel.

Sorkar khawih zinga mi, 'Mizorama raltlante awmna hmun tur, enkawl dan tur leh kaihhruaina mumal tak sorkarin siamin, khauh takin lekkawh zui rawh se' tih chu pawm a ni.

Report-a tarlan danin, YMA-ah hian branch 819, group YMA 50 leh sub-headquarters pariat a awm a; member 4,97,946 awmin, mipa 2,92,237 leh hmeichhia 2,05,709 an ni. Mizoram páwnah Assam, Meghalaya, Manipur, Tripura leh Nagaland-ahte YMA branch leh group a awm a, India ram pawn Bangladesh-ah Sajek branch a awm bawk.

Kum 2023-24 chhunga CYMA budget Rs 2,01,11,760 a nih laiin, Rs 3,82,34,164 hmuh a ni a, sum hmuh aia tam Rs 4,05,94,080 hman a ni. Kum 2024-25 budget atan Rs 2,03,31,980 pawm a ni a, kum hmasa aiin Rs 2,20,220 (1.09%)-in a tam zawk.

YMA RORELIN A PAWMTE:

YMA KHAWIH
# Faina leh thianghlimna kawnga hma kan sawn theih nan bawlhhlawh paih dan inzirtirna neih ni rawh se.
# Plastic bûr/bottle-in kan ram a tihchhiat nasat avangin a hman tlem dan inzirtir leh thil danga hman ṭangkai dan kawng zawn ni rawh se.
# Kum tin fûrpui a lo thlen dawnin hemi ken tel chhiatna hrang hrang laka lo inven lâwkna turin fimkhurna hapta/thla ram pumah hman ṭhin ni rawh se.
# Mizoram chhunga kan kawngpui neihte vil kawngah YMA-in hma la rawh se.
# Ruihhlo do kawngah YMA-in tun aia chak zawkin hma la rawh se.
# Mizo ṭawng humhalh kawnga YMA hmalak mekna hi chak zawka kalpui ni rawh se.
# YMA Inkhawmpui Lian neih loh kumah sub. hqrs. YMA inkhawmpui neih ni rawh se.
# Company/corporate-te'n Mizoram chhungah CSR tam zawk an hman theih nan CYMA-in hma la rawh se.

SORKAR KHAWIH
# Mizorama raltlante awmna hmun tur, enkawl dan tur leh kaihhruaina mumal tak sorkarin siamin, khauh takin lekkawh zui rawh se.
# Mizoram Lokayukta hian thubuai chhuitu tur investigation agency hranpa a neih theih nan hmalak ni rawh se.
# Tunlaia sikul ṭhenkhatin pawl 4 thlenga Mizo subject an la zirtir mumal lo hi sorkarin hma la rawh se.
# Mizoram Education (Establishment & Management of Private School) Rules, 2006 (Elementary - Higher Secondary School) hi a ṭul anga siam ṭhain, ennawn ni rawh se.