UDPA Minister-in DAY-NULM Exhibition cum Food Festival a hawng

Deendayal Antyodaya Yojana National Urban Livelihoods Mission (DAY- NULM) chuan nimin khan Aijal Club Park-ah DAY-NULM Exhibition cum Food Festival an buatsaih a, Urban Development & Poverty Alleviation minister K Sapdanga'n a hawng.

Exhibition cum Street Food Festival hi DAY-NULM hnuaia ṭanpuina dawngtute tana buatsaih a ni a, tun ṭum hi a vawi thumna a ni. Dawr 46 hawn a ni a, mi ṭhahnem takin an kutchhuak thil chi hrang hrang an pho chhuak a ni.

UDPA Minister chuan, DAY-NULM chu mi harsate chhawmdawltu, eizawnna nei lote'n eizawnna ngêlnghet an neih theihna tura hma latu a nih thu sawiin, "Mihring chawi kanna tak tak a ni a, kan mihringpuite tana rawngbawlna, eizawnna nei lote tan eizawnna siamsakna, mi harsate chhawm­dawlna a ni," a ti a, mi dangte hrilh darh zel turin kal khawmte a chah.

Self help group (SHG) chu a ṭangkai hle tih sawiin, SHG-a la tel lote chu SHG thar din zel turin K Sapdanga chuan a chah a, "SHG din duh an la awm phawt chuan sorkar chu a inpawt fân zel thei a ni, i din belh zel ang u. Eizawnna hi a titu an tamin a hlâwk zawk a, inhuphurh chi a ni lo. Kan kutchhuak hian belhchian a dâwl phawt chuan mi a hîp mai, kan thilphal phawt chuan kan hlâwk telh telh ang," a ti.

K Sapdanga chuan, sorkar flagship programme Bána Kaih Scheme chungchang sawiin, "Bána Kaih hi kan hlâwkpui theih nan leh kaih chhuah ni turin bán kan lo phar ve a ngai a, kan theih chinah kan pên chhuah ve a ngai. Kaih chhuah theih turin i awm ang u," a ti a; nasa taka ṭan la turin Bána Kaih chhawr ṭangkai tumtute a chah.

Festival hawnna hi UDPA secretary Lalmalsawma Pachuau-in a kaihruai a, UDPA director leh DAY-NULM mission director Dr Andrew H Vanlaldika'n hmalakna tlangpui a sawi. Vawiin leh naktukah chhunzawm a ni dawn a, zing dar 10:30 aṭanga zan dar 8 inkarah tlawh theih a ni.

DAY-NULM hnuaiah Mizoramah SHG 1,521 an awm a, Aizawl district bikah 526 an awm; SHG-te bul ṭan nan revolving fund pek ṭhin a ni. Thiamthil zirna kalpui niin, mi 10,733 zirtir an ni tawh a, mi 5,158-in eizawnna an neih phah tawh.

Eizawnna bul ṭanna tura inṭanpui nan scheme hnuaiah loan inpek theih niin, mimal 1,922 leh group 138 hnenah loan pek a ni tawh a; mimalah Rs 2,00,000 leh pawlah Rs 10,00,000 thleng pek theih a ni. Street vendor mi 3,474 identity card siamsak tawhin, mi 2,460 hnenah loan pek a ni tawh a; centre for urban homeless hnuaiah shelter 97 an enkawl mek bawk.