Mizoram jail 10-ah mi 1,734 tâng mek; Tâng zingah ruihhlo vanga táng mi 742

Mizorama jail 10-ah tâng mi 1,734 an awm mek a, chu'ng zinga 10 chu an nute an tàn vanga jail-a awm ve naupang an ni. Táng mek zingah ruihhlo vanga táng mi 742 an awm.

Mizorama jail 10-te chu mi 1,386 tàn theihna tura ruahman a nih laiin, mi 1,734 an táng mek a; táng awm thei zat tura bituk aiin 348-in an tam zawk.

Jail táng tamna ber Central Jail-ah táng mi 438 awm thei tura bituk a nih laiin, táng 796 an awm mek. Táng tlemna ber Lawngtlai District Jail-ah chuan mi 98 tàn theihna tura ruahman a nih laiin, táng mi 28 chauh an awm thung.

Jail-a táng zingah hian mi 56 chu dam chhunga táng tura an chungthu rel tawh a ni a, mipa vek an ni. Hrehawm taka táng tur (rigorous imprisonment)-a an chungthu rêl tawh mi 348 awmin, mipa 309 leh hmeichhia 39 an ni a; tân pangngai (simple imprisonment)-a tâng turin mipa 244 leh hmeichhe panga thiam loh chantir tawh an ni.

Hetih lai hian, táng mek zinga a tam zawk - mipa 924 leh hmeichhia 147 chu an chungthu ngaihtuah mekte an ni a, thiam an chan dawn leh dawn loh hriat a la ni lo.

Ruihhlo vanga jail-a táng mek mi 742 zinga 109 chu thiam loh chantir tawh an ni a, mi 633 chu an thubuai ngaihtuah mek a ni. Central Woment Jail bikah táng mi 143 awmin, chu'ng zinga 77.6% chu ruihhlo vanga táng an ni.