ZPM sorkar chiah khan Beichhua'n Deputy CM nih a tum - Lal Thanzara

Mizoram Pradesh Congress Committee (MPCC) president Lal Thanzara chuan, Sinlung Hills Council inthlanpui awm turah nimin khan Phuaibuang, Khawlian, Zawngin, Suangpuilawn leh Vanbawng khuaah thu sawiin, ZPM-in sorkarna an chan chiah khan Saiha bialtu MLA Dr K Beichhua'n deputy chief minister nih a tum niin a sawi.

Lal Thanzara chuan, ZPM-in BJP an thawhpui nia sawiin, "ZPM hian BJP an thawhpui a ni tih a lanna chu, BJP candidate pahnih dinna Siaha leh bial dang pakhatah khan candidate an dah ve lo a nih kha; an sorkar chiah khan Siaha bialtu K Beichhua phei chuan deputy chief minister nih a rawn tum nghal chat a ni. Mahse, mipui leh kohhran mite mitmei an vên avangin BJP duh dan an zâwm thei ta lo a ni," a ti.

MPCC President chuan, "MNF kha BJP nen an thawkho a, an sum hmangin an sorkar. Mahse, BJP thu an awih loh avangin BJP-in an han hrêk tak tak a, sorkar hnathawkte pawhin a hunah hlawh an la thei lo a nih kha," a ti a; Mizoramah Congress party chiah BJP sum hmang lo awmchhun niin a sawi.

Congress party chu remna leh muanna, sakhaw zalenna duhtu party an nia sawiin Lal Thanzara chuan, "Mizorama remna leh muanna thlentirtu chu Congress a ni. PC sorkar Pu Ṭhena kaihhruai khan remna leh muanna a awm theih nan hma an lo la a, mahse, Pathianin mal a sâwm lo. Pu Lal Thanhawla leh a minister-te lalṭhuthleng ken azarah remna leh muanna nei thei kan ni," a ti.

Congress President chuan, "Kan rama hmasawnna zawng zawng, airport te, rel kawng te, medical college te, kan kawngpui leh tui lak thleng hian Congress sorkar hnathawh rah a ni," a ti a; ZPM sorkarin cheng vaibelchhe tam tak nei mah se hmunphiah an lei thei lo niin a sawi a, tunah hian thingtlanga an mi leh sate'n NLUP kalpui leh tura an ngen nasat thu a sawi bawk.