Minister leh AR-te inkara harsatna Union MoS for Home hnenah thlen

BJP, Mizoram Pradesh president Vanlalhmuaka chuan October 23, Nilaini khan Home minister of state Nityanand Rai chu New Delhi-a an pisaah kâwmin, Mizoram minister pakhat leh Assam Rifles inkara harsatna thleng a hrilh; Petroleum & Natural Gas minister Hardeep Singh Puri leh minister of state Dr Jitendra Singh a kâwm bawk.

Ministry of Home Affairs minister of state Nityanand Rai nen an inkawmnaah Vanlalhmuaka chuan tun hnaia Assam Rifles sipaite leh Mizoram Power Minister inkara thil thleng sawi chhuakin, thil awm dan a hrilh a ni. Myanmar leh Bangladesh buai avanga raltlante leh ramri hung chungchang te, Mizoram venhimna kawnga thawktu hrang hrangte dinhmun chungchangte pawh a sawi.

Vanlalhmuaka chuan Hardeep Singh Puri nen an inkawmnaah Mizoramah tuialhthei chhêk khâwlna a awm loh avangin kawngah harsatna a awm hlekin tuialhtheiah harsatna a awm ṭhin thu a hrilh a; Mizoramah a rang thei ang berin oil depot siam a ṭul thu a sawi a ni.

Minister of state for PMO Dr Jitendra Singh nen an inkawmnaah Vanlalhmuaka chuan Mizoram dinhmun hrang hrang Prime Minister hnena thlen ngaite a sawipui bawk.