Red Ribbon School Quiz 2024-ah Maraland Academy pakhatna

Mizoram State AIDS Control Society (MSACS) chuan October 23-24, 2024 khan Aizawlah Red Ribbon School Quiz Competition an buatsaih a, Maraland Academy, Saiha zirlai Margareth T Lalrinhlui leh V Buirangsang te pakhatna an ni.

Red Ribbon School Quiz Competition-ah hian September 2024 khan Mizorama district khawpui 11-ah district level-a intihsiak buatsaih a ni a, district tina pakhatna ṭheuhte state level-a intihsiakah an inel leh a ni. State level-a inelnaah hian Presbyterian English School, Khawzawl Vengthar pahnihna an ni a, Mizo High School, Aizawl chu pathumna an ni.

HIV/AIDS chungchang sikul naupangte hnena zirtirna atana buatsaih quiz-a pakhatna Maraland Academy hi NACO buatsaihin hmarchhak state ho (regional level) intihsiaknaah Mizoram aiawhin an tel dawn a; pakhatna an nih chuan India ram pum huap intihsiaknaah Mizoram aiawhin an tel leh ang.

Kum liam taa Red Ribbon Quiz-ah khan Presbyterian English School, Republic Veng chu India ram pumah pakhatna an lo ni tawh a ni.