Thlai hralh leh lei dan tur sawiho

Aizawl District Agriculture Marketing Committee (DAMC) chuan chairman Lalhriatpuia, district bawrhsap kaihhruaiin nimin khan Horticulture conference hall-ah Bána Kaih (Handholding) Scheme hnuaia thlai lei leh hralh buaipui dan tur an sawiho a; AH&Vety minister C Lalsawivunga leh adviser to CM TBC Lalvenchhunga ten an telpui.

C Lalsawivunga chuan, “Sorkar hi kut hnathawktute lamṭang sorkar a ni a, kan intodelh theihna turin theihtawp i chhuah ang u," a ti a, theihtawp chhuahpuiah kal khawmte a sáwm.

Ṭhutkhawmah hian Aizawl district-a Bána Kaih scheme kaihhnawih sorkar officer-te an tel a; Mizoram Agriculture Marketing Board (MAMB) member Vanlalpeka'n Handholding Scheme kalpui dan tur a sawifiah. MAMB member dang H Lalchhanhima'n Handholding hnuaia thlai thar buaipui dan tur a sawifiah bawk.