Jan Suraksha Schemes sawiho

Lawngtlai District Consultative Committee (DLCC) chuan nimin khan SDO (Sadar) Margaret J Vanlalremmawii kaihhruaiin thla thum chhung kalpui tur 'Jan Suraksha Schemes - Saturation Campaign' kalpui dan tur an sawiho a; campaign hi Lawngtlai district-a gram panchayat 44-ah neih tum a ni.

Jan Suraksah Schemes hi social security schemes a ni a, May 9, 2015 aṭang khan sorkar laipuia Ministry of Finance hnuaiah kalpui a ni. Scheme hnuaiah hian micro insurance scheme pahnih - Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY)-te a awm.

PMJJBY hi life insurance scheme niin, kum khat atan Rs 436-in inziah luh theih a ni a; scheme kaltlangin eng vang pawh thihna a thlenin inziak luttu chhungte hnenah Rs 2,00,000 pek theih a ni.

PMSBY chu accidental insurance scheme a ni a, kum khat atan Rs 20-in inziah luh theih a ni. Chetsualna (accident) vanga thihna emaw, taksa pum piansualna (fully disability) emaw a thlenin Rs 2,00,000 pek theih a ni a, partial disability-ah Rs 1,00,000 pek theih a ni bawk.