Cherhlunah zîkhlûm qtl 600 seng tawh

Cherhlun khuaa zîkhlum chíngtute chuan fûr zîkhlum (off-season cabbage) an seng mek a; quintal 600 vel seng tawhin, quintal 1,000 vel thar an beisei.

Cherhlun khua hian kum 2019 aṭang khan fûr zîkhlum an buaipui ṭan tawh a, kuminah chhungkaw 42-in zîkhlûm an ching. Zikhlumte chu Horticulture department-in a chi an pek Ryzoki variety a ni. Zîkhlûm hralhna manah harsatna an tawh fo avangin tun hnai khan Horticulture additional director Lalhmingmawia Pachuau leh officer-te'n zîkhlûm sengpui pahin an tlawh a ni.

Zîkhlûm chíngtute chuan organic system-a an zîkhlûm chinte chu khârchhawngte nen a man chungchangah an inrem hleihtheih loh thu an sawi chungchangah Horticulture department hotute chuan, kharchhawngte'n kg khat Rs 40-a an lak ngam loh chuan supply chain-in department-in an buaipui mai tur thu an sawi a; chumi hnuah kharchhawngte'n Rs 40-in an la ta niin thu dawnna chuan a tarlang.