Ramri chungchangah DC-te inbe ṭhin; Secretary level inbiak hun tur la hriat loh

Assam leh Mizoram ramri chungchangah state sorkar pahnihte secretary level-a inbiak hun tur hriat a la ni lo a, ramri dep district-a bawrhsap (deputy commissioner)-te erawh chu a khát tâwkin an inbe ṭhin.

Vanglaini palai zawhna chhangin Home department hotute chuan, ramri chungchangah Assam leh Mizoram sorkar aiawhte secretary level-a an inbiak hun tur hriat a la nih loh thu an sawi a, "Assam sorkarah lehkha kan thawn tawh a, min rawn chhan har deuh avangin tun hnaiah reminder kan thawn leh tawh," an ti.

Home department hotute chuan, Assam sorkar aṭanga chhanna an hmuh hunah inbiak hun turah ruahmanna siam theih a nih tur thu sawiin, "Chhanna min rawn pek dan azirin ruahmanna siam a ni ang," an ti a; Mizoram lam chu inbe tura an inpeih thu an sawi.

Hetih lai hian, Home department hotute chuan ramri depa awm district DC-te chu a khát tâwka an inbiak ṭhin thu an sawi a, "Official tak chu a ni lo. Mahse, ramri-ah buaina a awm lohna atan an inbe ve reng a ni," an ti.

August 9, 2024-a Mizoram sorkar aiawh Home minister K Sapdanga kaihhruai leh Assam sorkar aiawh Border Protection & Development minister Atul Bohra kaihhruaite State Guest House, Aizawla an inbiak ṭumin March 31, 2025 hmaa Guwahati-a inbiak leh rêl a ni a; minister level-a inbiak leh hmain secretary level-ah state pahnihte inbiak hmasak phawt tur a ni.