April-September, 2024 chhunga Mizoram Voluntary blood donation 94.19% a tling

Sorkar sum kum kal mek, 2024-25 kum chanve chhungin Mizoramah thisen unit 18,643 pek a ni a, chu'ng zinga 94.19% chu pek bik nei loa a thlawna pek (voluntary blood donation) a ni. Health Minister chuan, thisen pek chu Mizote a ṭha zawnga India ram puma an lan theihna a nih avangin thisen pekah ṭan lak zel a ngaih thu a sawi.

Mizoram State AIDS Control Society (MSACS)-a Blood Transfusion Service-in Mizorama blood centre hrang hrang aṭanga thisen pek zat a lak khawm danin, kum kal meka kum chanve, April-September, 2024 chhungin Mizorama blood centre 11-ah thisen unit 18,643 pek a ni a, chu'ng zinga 17,559 chu a thlawna pek niin, pek zawng zawng aṭangin 94.19% a tling.

Thla ruk chhung hian blood centre 11-te'n blood donation camp ṭum 316 an nei a, chutah chuan thisen unit 12,490 pek a ni.

Health minister Lalrinpuii chuan nimina a pisaa Association for Voluntary Blood Donation (AVBD) ṭhutkhawmah thu sawiin, thisen pekah ṭan lak zel a ngaih thu a sawi a, "Mizoram hian a ber nihna a chhe zawngin kan nei nasa a, AIDS leh cancer-ah India ramah kan sang ber a, ruihhlo a hluar em em bawk. A ṭha zawnga a ber kan nih theihna remchang tak chu thisen pek a ni a, engtin nge hma kan sawn lehzual ang a, engtin nge thisen pe ṭha ber kan nih theih ang tih kan ngaihtuah a ngai," a ti.

Health minister Lalrinpuii chuan, "Thisen kan pek avanga hlimna thurûk awm hi mi dangte'n tawng ve se ka duh. Thisen petute hi chawimawi thiam a ṭha a, thisen petute tihphûrna zel a ni. Thisen peka hmasawn zel turin ṭan ila zel ang u," a ti a; blood centre-a thawktu indaih lohna phuhru turin thawktu dah belh tum a nih thu leh blood donation camp nei tura veivahna lam pawh ngaihtuah zel a nih dawn thu a sawi bawk.

Health Minister pisaa AVBD ṭhutkhawmah hian a thlawna thisen pek kawnga hmasawnna turte ngaihtuah a ni a, December 2024 chhungin Krismas pual thisen pêk rûnpui huaihawt leh an rêl. AVBD chuan, April-September 2024 chhunga voluntary blood donation 95.62% chu Mizoramah a thlawna thisen pek percentage a ṭhat ber ṭum a nih thu an tarlang a, thisen petu zawng zawng chungah lawmthu an sawi a ni.