Sericulture Minister-in cocoon a vailiam

Sericulture minister Lalthansanga chuan Mizorama Eri Cut Cocoon (pangang inzial) thar, state páwna hralh tur ton hnih (kg. 2,000) chu nimin khan Sericulture directorate kawt aṭangin a vailiam.

Eri Cut Cocoon hi Silk Samagra-II hmalakna aṭanga thar a ni a, kg khat Rs 700-a hralh niin, Minister-in a vailiam tak hi Rs 14,00,000 man a ni.

Lalthansanga chuan, Mizoram páwna thawn chhuah tur Eri Cocoon tam tham tak Mizoramah thar a ni chu lawmawm a tih thu a sawi a, "Kan pi leh pute hun lai aṭanga kan lo neih ṭhin dan aṭanga lo neih dan nghet (permanent farming system) kan kalpui zel a ngai. Kan eizawnna avangin kan ramngawte nasa takin kan tichereu ṭhin a, lo neih dan ngheta kan nei chho a nih erawh chuan kan ramngawte kan humhalh thei dawn a ni," a ti a; pangang khawi chu eizawnna awlsam leh hralhna awlsam a nih avangin ṭan la thar turin mipui a chah.

Sericulture director V Zothansanga chuan, pangang khawitute chu sorkarin a ngaihtuah thu leh an pangang khawite hlawk zawka an hralh theih nan sorkarin theihtawp a chhuak mek thu a sawi.

Sericulture Minister-in a vailiam Eri Cut Cocoon hi a hrin laiin metric ton 11 a ni a, a chhunga buhchiûm (pupa) tel loa hralh tur a nih avangin buhchium lak chhuah vek a nih hnuah ton hnih vel a ni. Cocoon hi Barpeta Marketing Jahur Uddin, Barbeta district, Assam-in kg khat Rs 700 zelin an lei a; buhchium ton 9 pawh Mizoramah Rs 300 - 400-in hralh vek a ni bawk.

Eri Cut Cocoon tharte chu Sericulture department leh Silk Cocoon Processing and Marketing Industry Private Limited chuan Mizoram páwna a leitute hnenah an hralh ṭhin a ni.