Council of Churches in Mizoram a ding dawn ta

Mizorama kohhran pariatte thawhhona tur Council of Churches in Mizoram (CCM) chu naktuk Pathianni hian hawn a ni dawn ta a, vawiin hian CCM hawnna inkhawmpui ṭan a ni dawn.

CCM hawnna inkhawmpui hi vawiin chhun dar 12:30 hian Mission Veng Presbyterian Kohhran biak-inah ṭan a ni dawn a, Mizoram Synod moderator Rev. R Vanlalnghaka kaihhruaiin rorel a ni ang. Rorel inkhawmah hian kohhran pariat aṭangin palai 552 an awm.

Rorel palai bakah hian Aizawla kohhran hrang hrang aṭangin palai ṭhahnem tak ruat an ni a, chu'ng mite nen chuan palai 1,800 vel an ni tura ngaih a ni. Palai nâwlpui huapin zanin aṭangin inkhawm a awm dawn a; zaninah kohhran hrang hrangte report ngaihthlak a ni ang.

Naktuk Pathianniah chawhma, chawhnu leh zanah inkhawm a awm dawn a; chawhma inkhawmah CCM hawn a ni ang a, CCM hruaitu turte lak luhna hun hman a ni ang. CCM inkhawmpui hi chief minister Lalduhoma pawhin a hmanpui dawn a ni.