KHAWTHLIR

Mei zu mi 3 man

Aizawl District Anti Tobacco Squad chuan nimin khan Zarkawt leh Chanmari veng huam chhunga sorkar pisa hrang hrangah phal lohna hmuna mei zu an awm leh awm loh an enfiah a; phal lohna hmuna mei zu mi pathum manin, dan angin pawisa an chawitir.

YCA Day lawm

Central Young Chakma Association (CYCA) chuan nimin khan Kamalanagar-ah YCA Day vawi 47-na an lawm a, Chakma Autonomous District Council-a Education officer Gana Chandra Chakma-a'n hmanpuiin, YCA flag a pawt pharh. YCA hi October 25, 1978-ah din a ni.

Meth siamna man

Assam Rifles sipaite chuan October 23, 2024 khan Zokhawtharah lirthei MZ-01 J-1633 aṭangin methamphetamine siamna Caffeine Anhydrous IP kg. 1,075 an man a; a neitua puh Lallawmkima (34) leh Haudeihkhuala (32), Zokhawthar ve vete manin Zokhawthar Police hnenah an hlan.

Exit meeting

Saitual district-a Rural Development scheme hrang hranga hmalak dan endik tura Ministry of Rural Development-in a rawn tirh National Level Monitoring team chuan nimin khan Saitual bawrhsap Dr Lalngura Tlau kaihhruaiin ‘Exit meeting’ an nei. Monitoring team hian Phullen, Thanglailung, Luangpàwn, Ngopa, Hliappui, Pàwlráng, Buhbàn, Dilkhan, Lungpher leh Sihfa khuaa RD scheme hnuaia hmalakna an enfiah a ni.

Mock exercise

Disaster Management & Rehabilitation secretary K Lalrinzuali kaihhruaiin nimin khan Planning conference hall-ah Mock Exercise on Flood and Landslide Disaster neih tur chungchang inhrilhhriatna hun hman a ni a, National Disaster Management Authority (NDMA) leh district tina District Disaster Management Authority hotute leh khawtlang hruaitute'n online-in an chhim. NDMA senior consultant Brig. Ravinder Gurung-a'n mock exercise neih dan tur a sawifiah a ni.

IPS-ah kai

Mizoram Police Service (MPS) officer pathum - Mizoram sorkara secretary ni mek C Lalzahngoa, ACB director Rodingliana Chawngthu leh DIG (Arms) C Lalnunmawia te chu Indian Police Service (IPS)-ah hlan kai an ni. IPS-a hlan kaina notification chu October 24, 2024 khan Ministry of Home Affairs-in a tichhuak.