Politics-ah ram mipui ban phâk tâwk hria nih a ngai - R Lalzirliana

MNF party chuan nimin khan Mizo Hnam Rûnah chhung inkhawm an hmang a, MNF Political Affairs Committee member R Lalzirliana'n thu sawiin, politics-ah ram mipui ban phâk tâwk hria nih a ngaih thu leh politics khel turin politician an ṭhat ber thu a sawi.

R Lalzirliana chuan, "Ṭhalai zawk, mi thiam, mi thar an ti a, tunah hian kohhran puihnain chutiang mite chuan ram an hruai ta a, kan beisei an phâk lo hle. Politics khel tur chuan politician an ṭha ber. Politics-ah chuan ram mipui ban phâk tâwk hria nih a ngai. Kum naupang zawk leh chakvak zawkte chu an ṭha teh meuh e, amaherawhchu, ram siam tur chuan mi puitling, mipui dinhmun hriaa kalsan lotu nih a ngai," a ti.

Mizoram sorkarah mipui an beidawng mek nia sawiin R Lalzirliana chuan, "Thil ṭha lo zawk a hring chhuak ang tih a hlauhawm hle. Lalṭhutthlenga ṭhut hian kan duh duh ti thei emaw intih a awl ṭhin. ZPM sorkar hi dan chunga lêng, roreltu uchuak tak ang mai niin an chêt danah a lang chho zel," a ti a; ration buhfai chungchangah a changtu minister-in 'Min challenge rawh se,' a tih chu chapona a nih thu a sawi.

MNF PAC Member chuan, CBI chungchangah Mizoram sorkar chu a êkna ngaiah a e leh nia sawiin, “Sorkar hi sumdawng a ni lo a, mipui harsatna sutkian hi roreltute tih tur a ni. Kan sorkar kal tawhte khan mipui phurrit chhâwk zângkhai turin hma an la thin. Pawisa pûk tum lote an ni a, mahse, finance enkawl thiam intite chuan thla tin an pûk tawh. Lal duh luat vanga an thusawite hian a la vaw let mek a ni," a ti.