Model Code of Conduct bawhchhiaah Minister leh sorkar hnathawkte puh

Mizoram Pradesh Congress Committee (MPCC) president Lal Thanzara chuan nimin khan Congress Bhavan-a political session-ah thu sawiin, Sinlung Hills Council (SHC) inthlan turah minister leh sorkar hnathawkte'n Election Code of Conduct an bawhchhia niin a sawi.

Lal Thanzara chuan, Education minister Dr Vanlalthlana chu October 23, 2024 tlai khan Ratu bialah a kal tih sawiin, "ZPM group President-in Ratua sorkar sikul zawng zawng chu public meeting-a kal turin lehkhain a sáwm a, mi eng emaw zat an tel a, Minister hoin sikul mamawh sawihona an nei a ni àwm e; thlate pawh an la ho a ni. Nimin (October 24) khan zirtirtute hlauthawngin press release, insawifiahna an nei zui leh. Hei hi Minister leh sorkar hnathawkte'n Election Code of Conduct an bawhchhiatna chiang tak a ni," a ti.

Congress President chuan, "Kan hriat sual loh chuan he Council (SHC) atan hian inthlan puan tawh hnu hian nuai za chuang sanction nia hriat a ni," a ti a, chu chu Election Code of Conduct bawhchhiatna a nih thu a sawi.

Lal Thanzara chuan, ZPM sorkarin ZMC chu sorkar kutah hlan an tum tawh thu te, Lengpui Airport pawh mi dang hnena hlan tuma hma an lak thu leh, Mizorama mini hydel project-te chu mi dang enkawltir an tum thute a sawi a, "Engmah ti loa min lo chhuah tawhtute'n kan ram ro hlu kan lo siam tawh chu enkawl thei lo leh thiam loin mi dang kuta hlan ringawt mai hi an tum a, kan fimkhur a ngai, Bhavan-te hi min hralh sak mai ang tih a hlauhawm," a ti.

MPCC President chuan, Mizoram kal zel dan tur Congress party-in tih tak zeta an ngaihtuah a ngaih thu sawiin, "Kan ram tluchhe mek, pawisa nei zawkte kuta kan ram ro hlute hlan tuma hma an lak mek lai hian theihtawp chhuah a ngai a ni," a ti. Inkhawmah hian MPCC hruaitute zinga mi John Rotluangliana pawhin thu a sawi a ni.