SAMITS General Conference vawi 8-na

Service Association of Mizoram Irrigation & Water Resources Technical Staff (SAMITS) chuan nimin khan IWRD CEO Auditorium-ah General Conference vawi 8-na an hmang a; adviser to chief minister (Finance & Planning) TBC Lalvenchhunga, MLA-in a hmanpui.

TBC Lalvenchhunga chuan, Irrigation & Water Resources department hnuaia technical staff-te chu mipui tana rawngbawl an nihna hriaa ṭhahnemngai lehzuala thawk turin a fuih a, "Ṭanrualna leh thawhhona ṭha tak in neih mekte hi chhawm nung zel u la, rilru thar puin ram leh hnam tan ngaihtuahna seng zel ang che u. Hmasawnna leh changkanna mila insiamrem thiam tur a ni a, information & technology lamah mite ruala pên ve zel tum tur a ni," a ti.

SAMITS General Conference hi an pawl adviser Lalrotluanga, chief engineer-in a kaihruai a, general secretary Remsangpuia leh treasurer Nukungi ten hmalak dan leh sum dinhmunte an tarlang. An pawl president K Hamlet kaihhruaiin rorel inkhawm neih a ni a, kum 2024-2026 chhunga an hruaitu tur an thlang bawk.