March 2025-ah Mualkhangah rél luhtir tum

Kolasib DC Robert C Lalhmangaiha kaihhruaiin nimin khan Bairabi-Sairang inkara rél kawng siam meka hmalaknate sawiho a ni. Railways hotute chuan March 25, 2025-ah Mualkhang thlenga rél luhtir theih an inbeisei thu an sawi.

Ṭhutkhawmah hian rél kawng siamtute hnathawhna avanga mimalin harsatna an tawhte rél kawngin a paltlang khaw hrang hranga VC-te'n an tarlang a; rél kawng siamna atana mimal ram lâka chinfel ngai la awmte chu chinfel a nih theih nan chak taka hmalak ni se, an ti.

Khawtlang hruaitute chuan, rêl kawngin a paltlang ram neitute'n zangnadawmna an la dawn kim loh chungchang te, Bairabi-Sairang inkara rel-in a hman tur electric ban phunna atana mimal ram compensation la dawng lote leh Railways hnuaia company-in an la chhinchhiah loh hmun ṭhenkhat a awm thute an sawi.

Hun remchang hmasa berah district collector te, Railways hotu te, rel kawngin a paltlang VC-te leh ram neitute nen joint verification nei turin ruahmanna an siam. Rél kawngin a paltlang tur atana ram lak chin pawn lama hmalakna hrang hrang awm nia sawi chungchangah Hortoki, Mualkhang leh Khamrang huam chhungah mi 13-in complaint an thehluh chungchang sawiho a ni bawk.

Ṭhutkhawmah hian Kolasib district sorkar hotu te, Railways hotute leh rel kawngin a paltlang VC hruaitute an tel a;

Jamira, Hailakandi district, Assam-a rél kawng chhia chu siamṭhat a nih tawh thu leh bungraw phur rêl Mizoramah a luh leh tawh thu tarlan a ni.