Mumbai-a Mizoram House hmun tur MP-in a tlawh

Lok Sabha MP Richard Vanlalhmangaiha chuan October 21-24, 2024 chhung khan Mumbai-a Mizoram House sak tur kaihhnawihah Maharashtra Chief Minister leh official dangte a kâwm a; Mizoram House hmun thar tur a tlawh bakah, Mumbai-a inenkawl mek Lok Sabha MP hlui C Lalrosanga a kan bawk.

Mumbai-a Mizoram House thar tur hi Navi Mumbai-ah sak tum a ni a, a satu tur thlan vek hnuah chhan hrang hrang avangin kum tam tak sak theih lohin a awm tawh a ni.

Richard Vanlalhmangaiha hian Maharashtra Chief Minister chu a chenna inah a hmu a; Mizoram Chief Minister-in Mumbai Mizoram House hmun thar tur chungchanga Mizoram sorkarin harsatna a lo tawh ṭhinte a theih anga ṭanpui tura a dilna lehkha a pe.

Mizoram House sa tura Mizoram sorkarin inremna a lo neihpui tawh (real estate builder) US Roofs Ltd. hotute pawh kâwmin MP chuan harsatna an neihte a sawipui a; ram petu City and Industrial Development Corporation of Maharashtra Limited (CIDCO) vice president leh managing director Vijay Singhal pawh a pisaah kâwmin, Mizoram sorkarin harsatna a tawh dante a thlen.

Lok Sabha MP hian Mumbai Mizoram House, Parel-a awm chu tlawhin, damlo awm mekte hnenah kanna pawisa a pe a; dam lohna vanga Mumbai-a inenkawl mek Lok Sabha MP hlui C Lalrosanga a kan nghal a ni.