YMA kumpuan bawhzui ṭha thlang; YMA member thi zingah mipa 82.54%

Central YMA chuan October 24, Ningania Aizawla YMA Rorel Inkhawm an hmanah lawmman chi hrang hrang an sem a, YMA kumpuan bawhzui ṭha ber atan Tuipuiral Group leh Dawrpui Branch thlan an ni. Kum khat kal ta chhung khan YMA member 1,690 an thi.

YMA Rorel Inkhawm report-a a lan danin, kum 2023-a YMA Inkhawmpui lian (October) leh kumina Rorel Inkhawm inkarah YMA member 1,690 an thi a, mipa 1,395 leh hmeichhia 295 an ni. Mipa thi zat 1,395 hi thi zawng zawng aṭangin 82.54% a tling a, hmeichhia thi zat chu 17.46% a ni.

CYMA hian YMA kumpuan bawhzui ṭha thlan chhuahte bakah, ramngaw leh nungcha humhalh ṭha, tuihna humhalh ṭha leh lui dung humhalh ṭha pakhatna aṭanga pathumnate hnenah lawmman an sem a; branch leh group-a pakhatnate'n Rs 10,000, pahnihnate'n Rs 7,000 leh pathumnate'n Rs 5,000 an dawng.

YMA Chanchinbu la tam leh YMA branch chanchinbu ṭhate hnenah lawmman pakhatna aṭanga pathumnate hnenah lawmman an sem bawk a; lawmman pakhatna Rs 5,000, pahnihna Rs 3,000 leh pahnihna Rs 2,000 a ni.

YMA Chanchinbu la tam ber chu Aizawlah Durtlang Branch (copy 363) leh Aizawl pawn lamah New Champhai Branch (copy 287) an ni a; member zat aṭanga chhûta la tam ber chu Serchhip Bûkpui Branch (71%) a ni. YMA branch chanchinbu ṭha ber atan Vaivakawn Branch chanchinbu 'Vaivakawn Weekly News' tih chu thlan a ni bawk.