Assam Rifles insawnna atan inremna ziah a ni tawh - CM
Chief minister Lalduhoma chuan, Aizawl khawpui laili aṭanga Zokhawsanga Assam Rifles insawnna atan inremna (agreement) ziah a nih tawh thu a sawi a, "Agreement hi April 1, 2025 aṭanga hman tur a ni," a ti.
October 26, Zirtawpnia thuthar thehdarhtute CMO conference hall-a a kawmnaah Chief Minister chuan, Assam Rifles nen inremna an ziah tawh thu sawiin, "October 23, 2024 khan Delhi Mizoram House-ah agreement ziah a ni. Mizoram sorkar aiawhin GAD Secretary leh Assam Rifles aiawhin Director General-te'n hming an ziak," a ti a; agreement ziahnaah Delhi-a awm remchang ZPM, MNF leh BJP MLA-te pawh an tel thu a sawi.
Lalduhoma chuan, Aizawla AR hotute leh an insawnna tura a kaihhnawih department-te a ṭhutkhawmpui thu sawiin, "Kan thu a inhmu lo a, kan inhnial tih tih a ni. Chuvangin, official meeting chuan a sawi fel theih dawn loin kan hria a, official loin hma kan la. Theihtawp chhuahin CMO lama ka thawhpuite nen hma kan la a, tunah chuan agreement ziah a lo ni ta," a ti.
Chief Minister sawi danin, agreement hi Union Home minister Amit Shah duh dan ang leh pawmpuinain, amah nen an inhmuh leh hmain ziah a ni a; agreement ziah hnuah an inhmu. AR leh Mizoram sorkar inremna hi April 1, 2025 aṭanga hman tur a ni a, a chhan chu Mizoram sorkar leh Assam Rifles-in tihfel ngai an la neih ve ve vang a ni. April 1, 2025-ah chuan tihfel hman tawh beisei a ni.
AR biak-in chungchang sawiin CM Duhoma chuan, "MNF khan an sorkar laiin dan an lo siam a, chutah chuan AR hmun hi mimal tana hman theih loh turin an ti. A hnuah an tidanglam a, AR an chhuah chuan an hmunhma zawng zawng chu sorkar ta turin an dah. He dan hi kan hman chuan AR an chhuah chuan biak-in hi sorkar ta tur a ni," a ti a; chutih rualin, dan chu tihdanglam theih a nih angin tihdanglam a nih tur thu a sawi.
ZPM pisa hmun tur hauh lâwk an neih tawh thu sawiin Lalduhoma chuan, "Tunah hian kan pisa man tur Zoram puma kan unit hrang hrangah kan tuak mek. AR biak-in hi pisa atan neih kan tum lo hrim hrim," a ti.
Chief Minister chuan, AR-te thlahna hun hmang tura Union Home minister Amit Shah a sàwm thu sawiin, "December kar tìrah a ti a, mahse, anni hi chu an buai khawp a, an thusawi ang hian an awm lo leh ṭhin. Chuvangin, ka sawi huai ngam lo," a ti a; hemi chungchangah hian Union Home Minister thusawi ang sawi chhâwng mai a nih thu a sawi.
AR CHHUAHSAN TUR LEH LUAH ZUI TURTE
☑ HQ 23 Sector/Mizoram Range: Khatlaa ram acre 95.88-a zau, tuna 23 Sector/Mizoram range hmun.
☑ Raj Bhavan chhaka AR DIG quarters - ram acre 0.850-a zau.
THLA 3 CHHUNGA AR-IN SORKARA AN HLAN TURTE
☑ Chite river (Dhobi Nallah): 62.8 acres
☑ Assam Rifles biak-in leh a hmun: 0.63 acres
☑ Babutlanga AR ram leh an bungrua: 0.453 acres
April 2025 RAL HMAA AR-IN SORKARA AN HLAN TURTE
☑ Lammual leh a chhehvel ram acre 25.94-a zau: main barrack complex, unit hospital leh Lammual ram leh in - acre 1.1-a zau.
☑ AR Commandant quarters - Loch House.
☑ Quarter Guard tlang: acre 14.5-a zau.
☑ School area: acre 1-a zau, sikul area leh building.
☑ War Memorial leh mandir: acre 0.78-a zau.