November 2024 ral hmain Aizawlah dan pangngaia tui sem theih beisei

Public Health Eng-ineering (PHE) minister Prof. Lalnilawma chuan October 25, 2024 khan Tlawng lui kama Greater Aizawl Water Supply Scheme (GAWSS) Phase I & II a tlawh a; PHE hotute chuan, kumin November thla ral hmain Aizawl mipui hnenah dan pangngai anga tui an sem leh theih an beisei thu an lo hrilh.

Prof. Lalnilawma chuan, Cyclone Remal vanga Aizawl khawpui tui peknaa harsatnate sukiang turin PHE department-a thawktute'n theihtawp an chhuah tih sawiin, "PHE department-a thawkte'n chhun zan zawmin mipui harsatna sukiang turin thâ thlah loin hna an thawk a ni," a ti a; mipuite'n harsatna hrethiama dawhtheih taka an nghah avanga an lawm thu a sawi.

PHE Minister hian GAWSS Phase-I & II hmunhma - tui pump dan te, Tlawng lui lianin pump house a tihbuai tawh lohna tura ruahmanna siam mekte a enfiah a; Dihmunzawla Dedicated Power Supply Transmission Line & 132/33 kV Substation leh Supervisory Control and Data Acquisition (SCADA) for Water Management of Aizawl GAWSS Phase I & II a tlawh bawk.

PHE department hotute chuan, tun dinhmunah ni tin tui litre nuai 390 an pump thei tawh thu leh, November 2024 chhungin Aizawl mipui hnenah dan pangngai anga tui sem theih an inbeisei thu an sawi a ni.

Tlawng lui lianin pump house leh an hmunhmate a tihchhiat nasat avanga tui pump a khaihlak tawh loh nan pump house chhuat chu metre 2.7-a tihsan an tum thu leh tih dan tur an ruahman thu te, vertical turbine pump chu tuilianin a chîm tawh loh nan a chhuat tihsan a nih tur thute an sawi.

PHE Minister hi PHE secretary F Liantluanga, chief engineer Zodinthari, superintending engineer Lalrinzuala leh department official dangte'n an ṭawiawm a ni.