KHAWTHLIR

CS thar tur dil

Chief minister Lalduhoma chuan, Mizoram chief secretary atan Prime Minister leh Home Minister hnenah Vumlunmang Vualnam, IAS an dil thu a sawi. October 26, 2024-a press conference a neiha CM-in a sawi danin, CS ni mek Dr Renu Sharma chu October 2024 tawpah pension-in a chhuak dawn a; Renu Sharma thlak tura sorkarin a dil Vumlunmang chu sorkar laipuiah secretary niin, Civil Aviation a enkawl mek. CS atan Vumlunmang a theih loh pawhin an duh zawng AMGUT cadre-a mi thlang turin an ngen a ni.

Online RTI 6,994

Mizoram sorkarin a siam RTI Online kaltlangin kuminah sorkar department/board hrang hrangin zawhna 6,994 an dawng tawh a, chu'ng zinga 505 chu October 2024 chhunga an dawn a ni. Kum 2022-23 chhung khan RTI Online kaltlang hian sorkar department/board hrang hrangin zawhna 2,526 an dawng a ni.

Vawk thi leh suat 37,933 tling tawh

Kuminah January 1 aṭanga October 26, Inrinni thleng khan Mizoramah vawk pûl hri, African Swine Fever vangin district 11-a khua/veng 251-ah vawk 14,240 a thi tawh a, hri darh tur ven nan vawk 23,693 suat a ni tawh. Vawk thi leh suat hi a vaiin 37,933 a ni.

Chetsualnaah thi

Johny Lalṭhazuala (45), New Serchhip Chekhnai chu October 25, zan dar 7:30 vel khan a maxicab khalhin Sailiamkawn bulah a chesual a, kawng thlangah a tlan liamin a chetsualna hmunah a thi. Maxicab-ah hian a khalhtu chauh a chuang a ni.

Beer leh zial man

Assam Rifles chuan October 25, 2024 khan Melbuk huam chhungah ram dang aṭanga lak luh ram dang meizial báwm 158, e-cigarette 448 leh beer bawmpui sarih an man. Foreign cigarette an man hi Rs 4,10,800 hû a ni a, e-cigarette chu Rs 5,90,500 hù leh beer chu Rs 25,200 hù a ni.

Kolasib DC-in vawk talh khap

Kolasib district magistrate Robert C Lalhmangaiha chuan thupek chhuahin, African Swine Fever lênna huam chhungah vawk khap a nih thu a tarlang. Robert C Lalhmangaiha chuan, "Hri lenna hmun aṭangin vawk, vawksa leh vawksa aṭanga thil siam reng reng lak chhuah khap a ni. Vawk thi chu thûk takah chinai nen phûm tur a ni a, vawk thi leh suat tur nei tan Vety department-ah report tur a ni," a ti. Thupek bawhchhiate chu BNS Section 223 hmanga hrem theih an ni.