Vairengte-Sairang four lane siam turah ram zangnadawmna pek tur tihfel a ni

Chief minister Lalduhoma chuan October 26, Inrinnia CMO conference hall-a press conference a neihah tun hnaia Delhi-a a zin chanchin a sawi a; NH Vairengte-Sairang inkar kawngpui thlûr lia laihna turah ram neitute hnena zangnadawmna pek tur tihfel a nih thu a sawi.

CM Lalduhoma chuan Delhi-ah mi pawimawh 11 a hmuh thu sawiin, "Ka zin laiin Prime Minister chu Russia-ah a zin a, ka rawn haw hma ni chiahin a rawn haw a, ka haw dawn ní-ah hun mi pe a, kan inkâwm. Ani bakah hian Defence Minister, Home Minister, Road, Transport & Highways Minister, Commerce & Industries Minister, Cabinet Secretary, Chief of Army Staff, Assam Rifles Director General leh mi pawimawh dangte nen kan inkâwm," a ti.

Lalduhoma chuan, Vairengte-Sairang inkar thlûr lia siam tur, forest clearance fel loh vanga hna thawh theih loh chu Road Transport & Highways minister Nitin Gadakari hnenah a bawhzui tih sawiin, "Supreme Court chuan Chief Secretary hnenah a chinfel dan kawng ngaihtuah turin a rawn ti a, kan ngaihtuah a ni," a ti a, chinfel harsa tak a nih thu a sawi.

Forest department-in forest reserved an ti a, ram neitute'n pass neiin chiahte pawh an pek ve bawk thu sawiin Lalduhoma chuan, "An dik ve ve a ni. Chuvangin, an pahnihin zangnadawmna pe mai turin kan ngen a, an remti. Zangnadawmna pek kawp hi India rama la thleng ngai lo a ni a; zangnadawmna tur hi Forest department tan cheng vbc. 90 vel leh ram neitute tan cheng vbc. 1,100 vel an dah," a ti.

Nitin Gadakari hnenah hian alkatra hmanga kawng siam chu a tlo loh avangin cement hmanga kawng siam remtihsak tura a ngen thu sawiin Lalduhoma chuan, "Hei hi ṭum danga kan la ngen ngai loh a ni. Alkatra hmanga kawng siamin tui a ngam lo a, ṭhál a rei si loh avangin kawng a chhiat hma avangin min tihtawpsak turin kan ngen," a ti a, an ngena chu MoRTH Minister-in a pawm viaua a hriat thu a sawi.

Chief Minister chuan, tun hnuah chuan cement hmang veka kawng siam theih a nih an beisei tih sawiin, "Fûr tluanin hna kan thawk thei dawn a, kawng pawh a tlo zawk ang. Mahse, cement hmang veka kawng siam theih hun tur erawh kan hre lo," a ti.

Union Commerce & Industries Minister nen Myanmar leh Bangladesh ramria insumdawn tawnna chungchang an sawi dun thu sawiin CM Duhoma chuan, "Ramria insumdawn tawnna hi hmun 11 neih kan duh. Insumdawn tawnna bakah hian ministry hnuai UNATI hi enterpreneur-te tan a ṭha em em a, mahni suma project siam tur a ni a, siam zawh a nih hnuah 50% an rawn tumsak thei," a ti a, UNATI chu Mizote'n an la hman ṭangkai ve loh thu a sawi.

Chief Minister chuan, UNATI atan India ram pum tan cheng vbc. 4,000 dah a nih thu sawiin, "Commerce & Industries Minister hi kan state tana min dahsak ve turin ka ngen. Mizoram aṭangin project pakhat chiah a la luh avangin in ngai pawimawh lo a nih hi min ti. Kan dil hnuah cheng vbc. 453 min dahsak. Mizo ṭhalaite'n bawh chak se, a tam thei ang berin project siamin thehlut se kan duh hle a ni," a ti.

CHIEF MINISTER SAWI DANGTE

■ Forest clearance-a harsatna a awm ṭhin Defence Minister hnenah kan kawngte strategic highway-ah min pawmsak rawh u kan ti.

■ Kan kal hmasakin scout battalion kan dil a, anni lamin China ramri-ah an duty a ngaih dawn avangin territorial army dil zawk turin min ti. Mizo Battalion Home and Hard kan dil a, hei hi Mizo hlang, kan ramria duty tur an ni a, kan hlawhtling kan ring viau. Defence Minister Cabinet Committee on Security hmasa berah a put luh tur thu a sawi.

■ Kan Health Secretary leh kan secretary-te hmalaknain Kolasib-a nursing school khu nursing college turin min pawmsak a, chumi atan chuan cheng vbc. 7 dah a ni.