MZP-in ruihhlo do kawngzawh an huaihawt

Mizo Zirlai Pawl (MZP) Gen. Hqrs chuan an din champha pualin October 26, Inrinni khan Aizawlah 'Ruihhlo - zirlaite hmelma' tih thupui hmangin ruihhlo do kawngzawh an huaihawt a; Education minister Dr Vanlalthlana leh Excise & Narcotics minister Lalnghinglova Hmar ten an telpui.

Ruihhlo do kawngzawhah hian Aizawla sikul 25 aṭangin zirlai ṭhahnem tak an tel a; Millennium Centre leh Sikulpuikawn aṭanga kawng zawh ṭanin, Vanapa Hall kawtah an intâwk khawm a, inkhawm tawi buatsaih a ni.

Vanapa Hall kawta inkhawmah Education Minister chuan, Mizoramin hmelma hrang hrang a nei tih sawiin, "Kan hmelma lian berte zinga mi chu ruihhlo a ni. CYMA rorel inkhawma kan hmuh angin mitthi zinga 82.54% chu mipa an ni a, hei hian ruihhloin kan ram a tihbuaizia a tilang," a ti.

Dr Vanlalthlana chuan, middle school leh high school zirlai nih laia ruihhlo ti ṭan tam tak an awm thu sawiin, "Middle School zirlaite chhiar duh tur zawnga ruihhlo chungchang te, nun dan mawi leh ṭha chungchangte leh naupang siamṭhat nana thil pawimawh dangte thawnthu (comic) bua siamin buatsaih mek a ni," a ti a; tumruhna nen zu leh ruihhlo khawih loh tura intipaukhauh tlat tura zirlaite a chah rualin, zirlaite ruihhlo laka an fihlim theih nan kohhran leh Education department-te'n ṭan an lak lehzual a ngaih thu a sawi.

Excise & Narcotics minister Lalnghinglova Hmar chuan, zirlai naupangte chu an duhthlanna hmang thiam turin a chah a, "Ruihhlo ngawlvei nge in duh vei loh, tih duhthlanna chu in kutah a awm. Vawiin hi zirlai zawng zawng tan ruihhlo chungchangah duhthlanna hman dik ṭanna ni lo ni mawlh rawh se," a ti.

Inkhawmah hian MZP president H Lalthianghlima, general secretary Chinkhanmanga leh treasurer Zairemthanga te pawhin thu an sawi a; pungkhawmte'n ruihhlo ti lo tura intiamna thu an sawi rual a ni.