Sawiselna leh rawtna thlen turin chah

Mizoram Public Service Commission (MPSC) chuan thuchhuah siamin, MPSC hnathawha sawiselna leh rawtna nei tan Chairman/Secretary hnenah thlen theih reng a nih thu an tarlang.

MPSC chuan, "Sorkar leh mipui tana MPSC-in hna a thawhnaah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng a, chanchinbu leh social media-a kan zualko hmain thil awmzia hriat chian hmasak tum phawt tur te, sawiselna leh rawtna neite chuan office-ah ziaka thehlut zawk ṭhin turin Commission chuan mipui a ngen a ni," an ti.

MPSC chu din a nih chhan ang ngeiin mipui leh sorkar tan chhenfâkawm takin hna a thawk ṭhin tih tarlangin MPSC chuan, "Kum 2024 calendar year kal mekah hian sorkar hnathawk laite an kaisan theihna turin Departmental Promotion Committee (DPC) vawi 209 a ṭhu tawh a, mi 505 an hnathawhnaah an kaisan theih phah. Direct recruitment hmanga hna ruak hnawh khahna turin kum 2024 chhungin group A leh B (gazetted) bikah post 22 atan vawi 17 examination neih a ni tawh," an ti a; group B (non-gazetted) hna lakna atan ṭum thum exam buatsaih a nih tawh thu an tarlang.

MPSC chuan, department panga hnuaia thawktute tan departmental examination vawi khat huaihawt a nih tawh thu te, sorkar hna thawk lai mekte kaisanna turin department pariata thawktute tan limited departmental examination neih a nih tawh thu an tarlang bawk.

MPSC TARLAN DANGTE
◆ Mizo language proficiency test/exam vawi khat neih a ni tawh.
◆ Mizoram sorkar thuchhuak angin group A leh B pay matrix level 6 leh a chung lam hna lakna atan MPSC-in exam a kalpui mek.
◆ Home leh Excise & Narcotics department-a ASI leh a chung lam te, EFCC department-a deputy ranger (level 6) chin chunglam te, Commerce & Industries-a marketing inspector (level 6) chin chung lamte hi MPSC-in a buaipui tur chi a ni. Heng department-a thawktu dang - assistant marketing inspector (level 4), forester (level 4) leh head constable (level 4)-te chu MPSC huang pawn lama mi a ni.
◆ Home department-a ASI (M) lakna kalpui mekah ‘measurement’ tih hun pawhsei a ni leh, metre 1,000 leh metre 100 tlân hun tihdanglam hrethiam lo an awm niin a lang. MPSC portal/website-a lut thei lo an awm tih hriat a ni a, leimin/kawng chhia vanga mahni measurement tih huna Aizawl thleng thei lo eng emaw zat an awm tih hriat a ni bawk a; loh theih lohin measurement lak hun pawhsei a ngai.
◆ Examination buatsaih a nih reng rengin felfai thei ang bera buatsaih ṭhin a ni a, zawhna siam chungchangah te, syllabus duan chungchangahte candidate tana ṭha ber tur nia hriat angin hmalak zel a ni.