H/S Quiz-ah St.Joseph HSS thiam ber

Mizoram Building & Others Construction Workers Welfare Board, Aizawl Smart leh MZP-te'n October 21, 2024 aṭanga high school zirlaite tana quiz an buatsaih chu October 25 zan khan Ignite Studio-ah khar a ni a, St. Joseph Higher Secondary School zirlaite pakhatna an ni. Quiz khârna hi minister K Sapdanga'n a hmanpui.

High School Quiz-ah hian sikul 22 aṭangin zirlaite an tel a; pakhatna St Joseph HSS-in Rs 30,000 an dawng. Pahnihna CLS Academy-in Rs 20,000 leh pathumna Solomon's High School-in Rs 10,000 an dawng a; best quizzer C Lalramtiama, St Joseph HSS hnenah lawmman hlan a ni bawk.

Quiz final-a khuallian K Sapdanga chuan, Inter High School Quiz chu inelna a ni satliah lo a, Mizoramin mithiam tak tak a mamawh chherna ṭha a nih thu a sawi a; "Mizoramin kan mamawh chu mi taima, thawkrim leh mi rinawm an ni," a ti a, rim taka an zirlaite zir tur leh rinawm keng tel zel turin zirlaite a chah.

High School Quiz khârnaah MZP president H Lalthianghlima, MBOCWWB secretary Angela Zothanpuii leh Aizawl Smart City public relations officer Lalhmangaihsangi te pawhin thu an sawi a ni.