Governor-in zirlai thar lawmna hun hmanpui

Mizoram Chakma Students' Union (MCSU) Zonal Hqrs, Aizawl chuan October 26, Inrinni khan Vanpa Hall-ah zirlai tharte lawm luhna leh awareness campaign an buatsaih a, Governor Dr Hari Babu Kambhampati-a'n a hmanpui.

Dr Hari Babu Kambhampati chuan, Chakma Autonomous District Council Executive Committee tum 11-na, October 4, 2024-a neihin primary aṭanga a chung lamahte Mizo subject zirna kalpui tura thutlukna ṭha a nih thu a sawi a, "Hei hian zirlaite ṭawng chi hnih bel taka thiam kawngah a pui dawn. Mizo ṭawng thiamna chuan Mizote nena inbiakpawh leh inhriatthiam kawngah thui takin a pui theih dawn bakah, zirna leh hnathawhna hmun thlengin a pui thei dawn a ni," a ti.

Zirna chawisan kawngah Mizo zirlai pawl dangte nen lungrual leh inzahtawn taka hmalak tlan a pawimawh thu sawiin Larsap chuan, "Tualchhunga mite tih dan leh hnam ziarángte zira inher rem pah chung leh an kalphung, khawtlang nun leh rinnate zah tak chungzelin inkawmhona leh thil tihhonaahte in hnam ziarang leh tih dan phungte chawi nun zel tum ang che u," a ti a; sikul/college-a infiamna, zirna leh hmalakna hrang hrangahte tel tam turin a chah.

Khualzahawm Kalendra Tongchangya, CADC assistant adult education officer pawhin thu sawiin, ram leh hnam tana innghahna tur an nih avangin theihna an neihte ringhlel loa taima taka hma lam pan zel tum turin zirlaite a fuih a ni.