Education Minister-in aia upa zahna chhawm nung turin zirlaite a chah

Nimin October 27 kha Zirlaite Ni a ni a, he ni pual hian Education minister Dr Vanlalthlana chuan thuchhuah tichhuakin, zirlaite chu aia upate zahna chhawm nung turin a chah.

Education Minister chuan, zirlaite'n aia upate zahna vawng reng se a duh thu sawiin, "Mizo hnam nuna mawi em em, kan pipute aṭanga kan chhawm chhoh zel a ni a, kan hnam nunah aia upate hlutna leh pawimawhna a sang hle. Puipunnaah leh social media-ahte pawh aia upate bula sawi àwm leh àwm lo ngaihtuah ṭhin ang che u," a ti.

Mizoram hmun hrang hranga zirlaite'n zirna ṭha an dawn theih nan sorkarin ṭan a la zel tih sawiin Dr Vanlalthlana chuan, "Zirtirtu indaih lohna phuhrûk nan primary, middle leh high school zirtirtu tur casual teacher ṭhahnem tak lak a ni a, he'ng mite hi hmun kilkhawr zawka awmte'n an ṭangkaipui hle," a ti a; Mizoram timawi a, zirna kawng hrang hrangah invawrh sang a, Mizo nihna mawi tak partir a, ram leh hnam tana taimak chhuah thar turin zirlaite a sawm a ni.

EDUCATION MINISTER SAWI DANGTE

▶ All India level-a hna exam-ah leh zirna sang zawk zawmna atana entrance exam-ahte tun aia lut tam thei tura inbuatsaih a ngai.

▶ Zirlai tibuai thei ruihhlo laka inthiar fihlim leh HIV/AIDS laka him nan mipat hmeichhiatna hman khawlohah inthiar fihlim a pawimawh.

▶ Ruihhlo ngai zinga a tam ber chuan kum 12-18 inkarah an ti ṭan a, high school leh higher secondary school kal laiin nun an tikhawlo hman.

▶ Mizoram mai ni lo, ram hrang hrangah ṭhalaite hna thawh tur nei lo hi buaipui tham a ni.

▶ Mizoramah hian kum tin graduate thar ṭhalai 3,000 chuang awm zel anga chhût theih a ni.

▶ Sorkara hna ruak awm chu kum khatah za tam a ni thei lo a, kum tina zirlai chhuak tharte thawh tur hi sorkar/company tan siam sèn a ni lo.

▶ Zirlaite'n mahni kalkawng tur thlira rilru nei taka lehkha an zir a pawimawh.