Aizawlah Arogya Mela tan a ni CM-in hriselnaa tan la turin mipui a sáwm

Nimin khan Assembly An­nexe building-ah Arogya Mela (AYUSH damdawi hman ṭangkaina beihpui) vawi lina ṭan a ni a, chief minister Lal Than­hawla'n a hawng. CM chuan, Mizote hnam hrisel kan nih theih nana ṭan la ṭheuh turin Mizoram mipuite a sáwm.

Chief Minister chuan, Mizote chu tun dinhmunah chuan hnam hrisel lo berte zinga mi kan nih thu sawiin, "Hnam hrisel tak nih i tum ang u. Hrisel tur chuan mahni inthunun te, insum theih leh fimkhur bakah, taksa sawizawi ṭhat a ṭul a ni," a ti.

Mizoram sorkarin damlo en­kawl nan sum a seng nasa hle tih sawiin, Lal Thanhawla chuan, "Kan hrisel loh vanga damlo kan inenkawlna senso hi zahthlak tham a ni. Damloha inenkawlna atan sorkar sum a chenin kan chèn a ni ber," a ti a; damdawia inenkawlna senso sorkar hnathawkte'n an hmuh let (reimburse) theih dan chu ennawn a, awmze nei zawka kalpui tum a nih thu a sawi.

CM Lal Thanhawla chuan, sorkarin a ngaih pawimawh ber pakhat chu mipuite hriselna a nih thu sawiin, "Damdawi-in hrang hrangte sorkarin thawm ṭhat a tum mek a ni," a ti a; AYUSH damdawi hnathawh dan chu muang deuh mah se, thil ṭha a nih thu sawiin, Mizote zingah AYUSH chu tihlar zual zel ṭul a tih thu a sawi a, Thenzawla AYUSH Hospital sak mek pawh an zo ṭêp tawh niin a sawi bawk.

Khualzahawm, Health minis­ter Lal Thanzara chuan, sorkarin AYUSH a ngai pawimawh tih sawiin, tun dinhmunah Mizoram sorkarin AYUSH doctor 52 a rawih mek thu a sawi a; AYUSH chu directorate hran anga kal­pui mek a nih thu sawiin, "Direc­torate puitling ni turin hma lak mek a ni," a ti.

Lal Thanzara chuan, nausen thihna leh raicheha thihna titlem tura ṭan lak nasat a ngaih thu sawiin, "Infant Mortality Rate (IMR) leh Maternal Mor­tality Rate (MMR) tihniam tur­in Mizoram mipuite kan ṭan rual a pawimawh a, Health de­part­ment-a thawkte'n tih tur kan la ngah hle a ni," a ti a; AYUSH damdawite chu IMR leh MMR tihhniamna kawngah ṭangkai tak an nih a beisei thu a sawi bawk.

Arogya Mela hawnna, As­sembly Annexe Conference Hall-a neihah hian chairman Dr K Ropari, Health principal director pawhin thu a sawi a; deputy director (Ayush) Dr C Lallunghnema'n Mizorama AYUSH hmalakna chan­chin a sawi.

AYUSH hi Mizoramah kum 1984-ah bul ṭan a ni a, kum 2000-ah Mizo Ayush doctor an awm ṭan hnuah mumal zawka kalpui a ni.

Arogya Mela-ah hian phai lam leh Mizorama ramhmul dam­­dawi buaipuitute'n stall an hawn bakah, Mizoram Health department hnuaia health scheme hrang hranga mite an inpho chhuak a; AYUSH doctor-te'n free clinic an nei a, a thlawnin damdawite an pe chhuak. Mela hi May 8, 2015 thleng neih a ni ang.