KHAWTHLIR

Thisen pe
Aizawla Congress party ṭhalaite chuan nimin khan Aizawl Civil Hospital tan thisen unit 71 an pe a, a petute hi mipa 64 leh hmeichhia pasarih an ni. Thisen petute zingah hian Mizo hmeichhe zinga thisen pa tam ber, Rebecca Saimawii, Khatla pawh a tel a, a vawi 40 a pekna a ni. Lungleia Congress ṭhalaite'n Lunglei Civil Hospital-ah thisen unit 27 an pe a; Mamita Congress ṭhalaite pawhin Mamit damdawi-inah thisen unit 10 an pe. Sy­nod Multipurpose Training Centre zirlaite mipa pasarih leh hmeichhia pariatte'n Synod Hospital-ah thisen unit 15 an pe bawk.

HSSLC result
MBSE chuan Higher Secondary School Leaving Certificate Examination 2015 result chu May 8, 2015 khian tihchhuah a tum. Result hi Chaltlanga MBSE office-ah leh MBSE website www.mbse.edu.in ah en theih a ni ang a, result bu chu Rs. 100-a lei theih a ni ang.

Lunglei town bus
Lunglei DTO leh Lunglei Town Bus Owners Association-te ruahman angin, Lunglei town bus service timing tihdanglam a ni a, hman ṭan nghal tur a ni. Zing kar bikah chuan Hauruang aṭangin zing dar 6-ah, Zobawk aṭangin zing 6-ah leh dar 8-ah, Pûkpui aṭangin zing dar 6:45-ah, Theiriat aṭangin zing dar 6:45-ah, Luangmual aṭangin zing dar 7-ah a chhuak ang.

Minister leh Pushpak
Transport minister John Rotluangliana chuan nimin khan a pisa-ah Project Pushpak chief engineer KK Razdan leh planning director Rajiv Markar-te kawmin, West Phaileng leh Rajiv Nagar inkar kawng siam ṭhat chungchang a sawipui.

Ph.D hmu
K Vanrammawia chuan Mizoram University-a department of economics aṭangin doctor of philosophy a hmu. A thesis chu 'An Analytical Study of Institutional Constraints on Agricultural Development with Special reference to Mizoram' tih a ni.