June thlaah Bru hruai kîr tum a ni

Mizoram sorkar chuan Mizoram aṭanga Bru tlanchhia, Mizoram mi dik takte chu June thla chawlhkar khatna aṭangin Mizorama hruai let a tum a, inbuatsaih mek a ni.

State Core Committee on Bru Repatriation chu nimin khan chief secretary Lalmalsawma, Home secretary ni bawk hoin CS conference room-ah an ṭhukhawm a; Home department-a senior officer-te bakah Mamit, Kolasib leh Lunglei DC-te an tel. Meeting chuan, Tripura transit camp-a Bru raltlan, Mizoram mite lak let dan tura Home department ruahmannate chu a pawmpui a ni.

Home department additional secretary leh DIG Lalbiakzama'n Vanglaini palai zawhna chhangin, "Meeting hian kan action plan leh movement plan-te a pawm a, Supreme Court thu angin, Mizoram mi Bru-te chu kumin June thla aṭangin lak let an ni ang," a ti.

Zawhna chhangin Lalbiakzama chuan, Bru lak let turte chu a zat chiah hriat theih a nih loh thu a sawi a, tehnaa Mizoram mi dik takte chu lak let tur an ni tih sawiin, "Mizoram electoral roll-a chuangte leh an thlahte lak luh an ni ang," a ti a; transit camp tinte chu lak luh hun tur siam vek a ni a, Kaskau camp-a mite lak luh hmasak ber tim a nih thu a sawi.

Home addl. secertary chuan, Bru lak lette hnena Central sorkar aṭanga hamṭhatna pek turte chu tihdanglam thar a awm lo tih sawiin, "Chhungkaw tinte Rs. 85,000 pek an ni ang a, kum hnih chhung a thlawnin ei tur buhfai pek an ni bawk ang," a ti. Bru pawlte'n cash assistance Rs. 1,50,000-a tihpun an phût chu tihpuitlin a la nih loh thu a sawi.

Home department hotute sawi danin, Bru-te lak kîr turte Mizoram an tlanchhiatsan hmaa an awmna khuaah awmtir tur an ni a, an khaw hmasa a ram tawh erawh chuan an awmna Assembly bialah dah tur an ni. Meeting chuan, Bru-te chu lak kìr hmain an awmna camp-ah thil awm dan sawipui phawt an rel a ni.

Home department hotute chuan, Bru hruai kìrna atan hian Ministry of Home Affairs-ah cheng vbc. 68 dil a nih tawh thu leh, MHA chuan cheng vbc. 4 a rawn pek tawh thu an sawi.