Mission Indradhanush sawiho

Lunglei District task Force on Immunization chu nimin khan Lunglei additional DC H Lianzela hoin a pisaah an ṭhukhawm a; hriselna lama sorkar laipui prog­ramme 'Mission Indra­dhanush' hnuai­a hmalaknate an thlirlet.

Mission Indradhanush hi naupang kum 2 hnuai lamte leh nu naupaite tana hri danna (vaccine) pek kimna tura duan a ni a, Lung­lei district atan April 7, 2015-ah hawn a ni.

Meeting-ah hian Lung­lei chief medical officer Dr VLMS Dawng­liana leh district immunisation officer Dr Lalparliani ten Mission Indradhanush kalpui tawh dan leh hmalak tawhnate an sawi a; Lung­­lei district-ah chuan - Tla­bung, Bung­hmun, Buar­pui, Lunglen leh Hnah­thial-te chu vaccine pek kim loh tamna khuate a ni tih hmuh­chhuah a nih thu an sawi.

Meeting-a tarlan danin, Mission Indradhanush hnuaiah hian Health department hnuai­a health worker-te leh ASHA volunteer-te'n khaw tina in tinah lutin, nausen leh nu naupai vaccine la kim lote an chhiar vek tawh a; tun dinhmun­ah chuan Lunglei district-ah vaccine pek ngai mi 333 chhinchhiah an ni.

Ministry of Health and Family Welfare lamin Mission Indradhanush atan sum an la rawn pek loh vangin harsatna an tawh thu te, hmun kilkhawr tak tak ṭawng inhriatpawh lohna, kawng awm mumal lohna leh mobile phone hman theih lohna a awm avangin an duh anga hma an lak chak theih loh thu te an sawi. Chutih rualin, awareness programme kalpui mek a nih thu leh, vaccine-te an pekna tur hmunah sem chhuah vek tawh a nih thu an sawi bawk.