Lungleia sikul kai hma duh lote duhtawk tawh turin ngen

Lungleia Sikul Ṭan Hma Duhlo Pawl tih invuahte chuan sikul ṭan hma an duh loh avangin nimin aṭang khan Lunglei District High Powered Committee vice chairman pisa kawtah lungawi lohna lantir­in, sitting demonstration an nei ṭan. Lunglei HPC vice chairman S Lalding­liana chuan lungawi lohna lantir tawh lo turin a ngen.

Sitting demonstration huaihawt­tute hian vawiinah chhunzawm leh an tum a, sitting demonstration-in awmzia a neih loh chuan naktuk aṭangin tiamchin awm loin Lung­leia MSU office-ah chaw nghei an tum nia thu dawn a ni.

S Laldingliana chuan Sikul Ṭan Hma Duhlo Pawl hruaitute chu a pisa-ah kawmin lungawi lohna an lantir chu chawlhsan tura ngenin, "Sorkarin thutlukna a siam tawh a, kum khat enchhin ni se tiin thu­tlukna siam a ni. Chuvangin, eng ang pawhin nuar mah ula, sorkar chuan a thu a sut leh mai a rin awm loh. Mahse theih tawp chhuah in kan nawr ang," a ti a, sorkar chu nuar zawnga nawr chi a nih loh thu a hrilh.

S Laldingliana chuan sikul kai hun chung­changah hian Lunglei district mipui aiawhin Chief Minister leh Education Minister a hmuh dawn tih sawiin, "A ngai anga kal leh tura rua­hmanna min siamsak turin kan ngen ang," a ti.

Sikul Ṭan Hma Duhlo Pawl chuan an thil duh ber chu sikul ṭan hma mai bakah, a ban hun inrual lo lutuk a ni tih sawiin, "Sorkar­in kumkhat chhung en­chhin a tih pawh hi thla khat chuang kan enchhin tawh a, a ṭhat zawkna kan hmu lo mai ni loin, buaina leh harsatna min thlen zawk tih alang reng tawh," an ti.