Zenghri danna pêk beihpui thlâk a ni

Nimin khan Mizoram pumah Intensified Pulse Polio Immunisation (IPPI) hnuaiah naupang kum nga hnuai lamte zenghri danna pêk rûnpui,  Oral Polio Vaccine (OPV) neih a ni. IPPI hi India ram pumah kalpui niin, January 19 khan President-in a hawng a, Mizoramah chuan nimin khan hman a ni.

Zenghri pek beihpui thlâkna hi Aizawlah chuan ITI Vengah hman a ni a, Health & Family Welfare principal director Dr F Lallianhlira'n a hawng. Dr F Lallianhlira chuan, natna hrang hrang laka invenna atana hri danna lâk chu a pawimawh tak zet tih sawiin, "Vaccine lak hi naupangte ṭhatna tur a nih avangin Health department chuan hma a la zel dawn a ni," a ti a; nu leh pate'n an fate vaccine lâk hun an hriat a pawimawh thu a sawi.

State immunization officer Dr Lalzawmi chuan, kum 15 hnuai lam zeng thut an awm chuan health worker-te leh doctor-te hriattir vat tur a nih thu a sawi a; tun ṭuma IPPI-ah hian Mizoram pumah naupang kum 5 hnuai lam nuai khat vel hri danna damdawi pek tum a nih thu a sawi bawk. 

Zenghri danna pêk beihpui thlâkna hi Lungleiah chuan Lunglei North Main Centre, Venglaiah chief medical officer (CMO) Dr Thani Pachuau kaihhruaiin hawnna inkhawm hman a ni a, Lunglei DC V Lalsangliana khuallian a ni.

Lunglei Bawrhsap chuan, naupang kum 5 hnuai lam nei nu leh pate'n an fate hriselna an ngaih pawimawh a, hri danna laktir ngei chu an mawhphurhna a nih thu a sawi a, "Naupangte hi ram hmathlir an ni a, an nungchang leh an hriselnate chu nu leh pate kutah a in­nghat tih nu leh pate'n an hriat a ngai," a ti.

Lunglei district immunization officer Dr Lalrinthangi sawi danin, tun ṭuma OPV-ah hian Lunglei district-a main centre 15 hnuaia naupang kum 5 hnuai lam mi 13,478 hnenah zenghri danna pek tum a ni a; zenghri danna pekna (booth) 218 siam niin, booth aṭang hian niminah pek a nih bakah, vawiinah pek chhunzawm a ni dawn a; chumi hnua la pek loh an awm chuan thawktute chu pek hmaih zawngin an vâk chhuak dawn a ni.

Siahaah chuan zing dar 7 aṭangin naupang kum 5 hnuai lam hnena OPV pek beihpui thlak ṭan a ni a; Siaha Vaihpi (Vengpui)-ah a hawnna hun hman niin, MADC-a chief executive member N Zakhai, Siaha DC Bhupesh Chaudhary leh Saiha CMO Dr C Hniecho ten an hmanpui.

Siaha district-ah hian zenghri danna pekna tur (OPV booth) 87 a awm a; booth hrang hrangte chu IPPI supervisor 20-in an vil a, overall supervisor atana ruat Dr K Rakhu leh district project manager Mary Vanlalpeki ten an enpui a ni.

Lawngtlaiah chuan Don Bosco School-ah district bawrhsap Shashanka Ala-i'n a hawng. DC chuan, Lawngtlai district chu ram dang - Myan­mar leh Bangladesh-te nen ramri thui tak inṭâwm a nih avangin zenghri danna chu a la tur naupangte'n kim taka an lak a pawimawh thu a sawi a, "Ṭhenawm ramah zenghri vei hmuh chhuah a la nih avangin fimkhur a ngai zual a ni," a ti.

Lawngtlai district-ah hian khua 198 a awm a, khaw hrang hrangah chuan nimin aṭang khan naupang kum 5 hnuai lamte hnenah zenghri danna pek ṭan a ni. Khua leh veng tina a pekna tur hmun bik siama pek phawt hnuah, pek kim loh an awm chuan an inah kal chilhin pek leh an ni ang. Serchhipah chuan nimin zing khan District Hospital tualah district bawrhsap Dr Lalzirmawia Chhangte-in a hawng. Bawrhsap chuan, sorkarin mipui hamṭhatna tur a buatsaihte chu a hlawhtlin theih nan mipui an pawimawh tih sawiin, "Zenghri danna pawh hi naupang kum 5 hnuai lam zawng zawngte'n an lak ngei a pawimawh. Zeng natna vei hnua inenkawl tum ai chuan, tuna lo invèn lâwk hi a 

ṭha zawk hle a ni," a ti.

Hawnna inkhawm kai­hruaitu chief medical officer Dr Lal­dawngliana Sailo chuan, zenghri chu India ram aṭangin ûmbo ni tawh mah se, ṭhenawm ramah a la awm avangin inven zui zel a ṭul avangin a danna damdawi inpek zel a la ṭul thu a sawi.