Mizoram sorkar hnathawkte'n DA 13%-a pungin an la dawn

Thla khatah vbc. 15 vel sum sen belh ngai dawn Mizoram sorkar hna­thawkte'n Dearness Allowance an lak theihna turin nimin khan notification chhuah a ni a; sorkar hnathawkte chuan April 1, 2015 aṭanga chhiarin DA pung an la dawn. DA pung avang hian sorkarin thla khat­ah cheng vbc. 15 vel a sen belh dawn nia thu dawn a ni.
Finance department hotute aṭanga thu dawn danin, Mizoram sorkar hnathawk zawng zawngin DA pung an lak tur hi thla khatah 13% a ni a, 6% chu pawisa faiin an la ang a, 7% chu GP Fund-ah dah tur a ni.
Sorkar hnathawkte hian January 1, 2006 aṭangin Central pay an zawm a, a taka hlawh an lakna leh arrear tel loa hlawh an lak ṭanna chu January 1, 2009 a ni. Central-in January 1 leh July 1-ah DA an tipung ṭhin. Central hnuaia thawkte chuan GP Fund-a dah tur 7%-a pung chu 1.7.2014 khan an hmang ṭan tawh a, pawisa faia an lak tur 6% chu January 1, 2015-ah an hmang ṭan tawh bawk.
Mizoram sorkar hnuaia thawkte erawh chuan sum harsat vangin DA pung an la thei lawk lo a; mahse DA pung an lak theih loh avangin lungawi lohna lantir an awm lo niin Finance hotute chuan an sawi.
Nimina hriattirna chhuah ang­in, Mizoram sorkar hnathawkte chuan April 1, 2015 aṭanga chhiar ṭanin, DA 13%-a pung chu an la ve thei dawn ta a, pawisa faia lak tur leh GPF-a dah turte chu an la ve ve thei dawn niin an sawi.
Mizorama sorkar hnathawkten Central pay an zawm vanga DA pung an lak avang hian thla khatah cheng vbc. 15 vel sorkar­in sum a sen belh a ngai dawn a; kum khatah chuan cheng vbc. 180 vel sen belh a ngai dawn tihna a ni.