KHAWTHLIR

MPC lawmthu sawi
MPC party chuan thu­chhuah siamin, village council leh local council inthlanna neih zawh taka MPC candidate thlan tlin zawng zawngte an lawmpui a, an chhuan thu an tarlang a, thlangtu mipuite chungah lawm­thu an sawi bawk.

Hnathawh enfiah
Mizoram Legislative Assembly hnuaia Subject Committee III-te chuan, an chairman Lalrobiaka hoin nimin khan Soil and Water Conversation department hnuaia hmalakna, Tuikual River Valley Project leh Tlangnuam River Valley Project hnuaia hna thawh mek an enfiah.

Inthlan thlirlet
Nimin khan Aizawl DC Dr Franklin Laltinkhuma hoin sorkar official, political party leh NGO-te'n April 30, 2015-a local council leh village council inthlan an thlirlet. DC chuan, LC leh VC inthlan tluang taka neih a ni chu lawmawm a tih thu a sawi.

Chaw nghei chau
RMSA hnuaia laboratory attendant leh clerk-te leh SCERT-a Guidance and Counselling staff-te chuan PRISM office-ah April 27 aṭanga chaw an nghei chu an la chhunzawm zel. Chaw ngheite hi an chau tawh hle a, tun thlengin damdawi-inah mi 20 hruai an ni tawh a, an zinga pakhat chu Thawhlehni zan khan admit a ni.

Bûk tling lo man
Legal Metrology hnathawkte chuan nimin khan M&B Indane Agency, Khatlaa dah tur gas endikin bûr 192 chu kg. 2 vela a tlin loh avangin a phurtu truck MZ-05 7624 khalhtu, N Hussein, Silchar chu Rs. 5,000 an chawitir a; M&B Indane Agency hnenah Rs. 20,000 pe turin an ti bawk. Thawhṭanni khan Kapliana Indane Gas Agency, Ngaizela dah tur gas phurtu truck MZ-01 B-2387 aṭangin bûr 110 chu kg. 2 velin a tling lo tih an hmuchhuak a; truck khalhtu Lalruatthanga, Vairengte nia insawi chu Rs. 5,000 an chawitir bakah, gas a tihchingpenna hû Rs. 19,000 chu Kapliana Indane Gas neitute hnena pe turin an ti a ni.

Vawk chaw sem
AH&Vety deptt. chuan an department hnuaia NLUP 2nd phase-a vawk vulh thlang­tu Champhai khaw­pui chhunga mite hnenah nimin khan vawk chaw an sem. Vawk chaw hi mi pakhat hnen­ah ip 10 zela sem a ni.