14th FC-a sum hmuh tura beiseite Beisei tur a awm lo: Chief Minister

Chief minister Lal Thanhawla chuan, 14th Finance Commission aṭanga sum hmuh tura beiseite chu beisei tur a awm loh thu a sawi a, "Special category state kan nihnate pawh nuaibo tum a ni," a ti.

Nimina 1st Mizo Feature Film Making Competition 2015, IPR Auditorium-a a hmanpuinaah thu sawiin Lal Thanhawl­a chuan, "Project hrang hrang kan neih­te pawh 90:10 a kalpui ṭhin chu 75:25 te, 50:50 te ni turin rawtnate sorkar laipuiin a siam a, sorkar laipui hmalakna avang hian state pariatte'n Prime Minister hnenah joint memorandum-te pawh kan thehlut a ni," a ti a; sorkar laipui ruahmanna avangin sum lamah Mizoramin harsatna lian tak a tawh thu a sawi.

Chief Minister chuan, hnam hrang hrangte inhriat tawn theihna kawng pakhat chu cultural exchange buatsaih a ni tih sawiin, "Hemi atan hian film a pawimawh thei hle. Mite ngaihsan tlak ni turin theihtawpa hmalak tlan a ṭul Ṭhalaite hian tuina bik an nei vek a, khawvel thang chho zel mila ke pên ve a ṭhat rualin, mahni duh dan leh tui dan anga kal hi a ṭha ber ang em tihte chu ngaihtuahnaah a awm mek a ni," a ti.

Mizo Feature Film siam inelna hi minute 80 - 90 chhung awh tur tih a ni a, a film siamtute chu thla hnih chhunga siam hman tura tih an ni. Inelnaah hian film pariat lutin, C. Hmingthangvunga pakhatna a ni a, Rs. 1,50,000 a dawng. Pahnihna - Lalawmpuia Khiangte-in Rs. 75,000 a dawng a, pathumna KC Zoherliana'n Rs. 75,000 a dawng bawk.