Khaw 3-ah inthlan ṭhat an phût

Tlabung bul hnaia khaw pathum - Diblibagh, Belpei leh Kalapani khuaa village council inthlan danah thil felhlel a awm niin V/C candidate ṭhenkhatte chuan an ngai a, hei vang hian Lunglei District Election Officer hnenah inthlan ṭhat emaw, vote chhiar ṭhat emaw an phût thu ziakin an thlen.

Inthlan buatsaih dana lungáwi lo candidate-te chuan, vote thlâk turte zinga ziak leh chhiar thiam lo leh mit tha ṭawh lote chu returning officer leh assistant returning officer-te'n an hruai a, tihluihnain vote an thlâktir niin an sawi a; vote thlâktute zinga 20% velin an kutzungpui an nemkâi avangin, chu'ngte chu vote nung anga pawmsak luiah RO chu an puh a ni.

Complaint thehlûttute chuan, returning officer-in party pakhat ticket-a seat chuhte inah zanriah a ei nia sawiin, dân kalh nia an hriat thu an sawi bawk.