Aizawla over-bridge dah dan tur sawiho

Aizawl City Road Authority chu nimin khan minister of state for PWD Lal Thanzara hoin CMO conference hall-ah an ṭhukhawm a, Aizawl khawpui­a ke-a kalna lei (pedestrian over-bridge) pathum siam dan tur an sawiho.

Ruahman dan chuan, pedestrian over-bridge hi Bazar Bungkawn, Canteen Kual leh Israel Point-ahte siam tum a ni a; Aizawl Municipal Council engineer, a kaihhnawih department hrang hrang aiawhte leh Dawrpui Local Council hruaitute'n en chiang se, meeting leh hunah thlirho ni se, an ti.

Meeting-ah hian Zarkawt kawng râwt hniama RCC hmanga kawng siam a, a hnuai lam parking atana siam chungchang pawh sawiho a ni a; zir chian phawt a, a remchan dan anga hmalak zui ni se an ti.

Aizawl City Road Authority meeting-ah hian MLA R Vanlalvena, AMC chairman CT Zakhuma, AMC councillor pahnih Rosiamngheta leh Ramhlunsanga, PWD secretary Lal­ramthanga, PWD engineer-in-chief R Vanlaltluanga leh AMC CEO M Zohmingthangi te an tel a ni.