Mizoram páwnah thawk ngam ang che u : Zodintluanga

Serkawna Christian Hospital School of Nursing chuan, nimin khan an hall-ah GNM batch 40-nate pualin Graduation Day an hmang a, minister Zodintluanga'n a hmanpui. Zodintluanga chuan, nursing zir zo thar mi 15-te fuihna thu sawiin, Mizoram páwna hna thawk ngam turin a chah.

Minister Zodintluang­a chuan, nurse zir zo tharge chu mi bik an nih thu hrilh­in, "Pathianin rawngbawl turin a dah che u a, mi 200 chuangin nurse zir an tum a, chuta ṭanga tling chu in ni. Kum thum leh a chanve harsa takin in zir a, tun­ah chuan nangmahnia khawvel dai ve tawh turin theihna in nei a ni," a ti.

Zodintluanga chuan, Mizoramah nurse mamawhna sang hle mah se, Mizoram sorkarin a chhawr vek thei lo a, Mizoram chhungah hnain a daih vek loh thu sawiin, Mizoram pawna hna thawk ngam turin a fuih a, "Mite tan malsawmna ni turin tih tur in nei a, tumruhna nen Pathian ring chungin kal zel rawh u,"a ti. Mizoram Youth Commission-ten Mizo ṭhalai 80 vel Singapore-ah nurse zir turin an thawn dawn niin a sawi bawk.

Christian Hospital School of Nursing-a GNM batch 40-na zirlai 15 zingah Best Graduate Award leh Best Student Award-te chu Laldin­tluangi Tochhawng-in a dawng ve ve a ni.