Assam-Mizoram ramri chingfel turin Theihtawp chhuah kan tum - MHA

Mizoram leh Assam ramri-ah buaina a awm avangin Satyendra Garg hian nimin khan Mizoram a rawn tlawh a; Governor PS Sreedharan Pillai, chief minister Zoramthanga, chief secretary Lalnunmawia Chuango, sorkar official leh NGO Coordination Committee hruaitute a kâwm. A rawn kal chhan ber chu, Mizoramin bungrua a lâk luhna kawng dan pin a nih vang a nih thu a sawi a ni.

MHA ngaihdanin, Mizoram nge, Assam thiam lo zawk tih Vanglaini palaiin a zawhna chhangin MHA Joint Secretary chuan, "Tu nge thiam a, tu nge thiam lo zawk tih zir chian tum kan ni lo. He harsatna awm hi chinfel kan tum ber a ni. Nimin (Nilaini)-ah pawh harsatna awm kan chingfel a, state pahnih inkara harsatna awmte hi kan chinfel theih zel kan beisei a, theihtawp kan chhuah zel ang," a ti.

Thinghlun rama Mizo thlam hâl leh thlai tihchhiatnaa tel Karimganj DC chungah MHA-in action a lak dawn leh dawn loh zawhna chhángin Satyendra Singh chuan, MHA chuan action a lâk dawn loh thu a sawi a, "FIR thehluh a nih avangin state pahnihin an ngaihtuah dûn thei," a ti a; buaina chu chinfel dan a awm zel thu a sawi.

MHA Joint Secretary chuan, Home secretary Lalbiaksangi hoa Secretariat conference hall-a NGO Coordination Committee-te nen an inkawmnaah, MHA chuan Mizoramin bungrua a lâk luhna kawngpui dan a ni chu a ngaimawh tak zet thu a sawi a, "Hei hi kan rawn kal chhan ber pakhat pawh a ni," a ti.

Assam leh Mizoram ramri buai chungchangah MHA Joint Secretary kaihhruaina hnuaiah committee din a nih thu sawi­in Satyendra Garg chuan, "Committee-ah hian Mizoram leh Assam lam an tel ve ve ang. Chutah chuan ramri chin nia in hriat leh in ngaihdante in lo thlen ang," a ti a; ramria buaina awm chinfel chu MHA duh dan a nih thu a sawi.